თავისუფლების მოედანზე „პანორამა თბილისს“ გააპროტესტებენ

საზოგადოება - 10:36, 31 Jan, 2015

1613

დღეს, 15:00 საათზე, 16 არასამთავრობო ორგანიზაცია „პანორამა თბილისის“ დაგეგმილ მშენებლობას თავისუფლების მოედანზე გააპროტესტებს. აქცია საკრებულოს შენობის წინ გაიმართება. გარემოს დამცველები და ხელოვნებათმცოდნეები ხელისუფლებას პროექტის შეჩერებისკენ მოუწოდებენ.

"პანორამა თბილისის" მშენებლობის წინააღმდეგ შემუშავებულ პეტიციას ათასამდე ხელმომწერი ჰყავს.

პროექტის მოწინააღმდეგეები მიიჩნევენ, რომ „პანორამა თბილისი“ ძველი თბილისის იერსახეს დაამახინჯებს, სოლოლაკში გადაადგილების სერიოზულ პრობლემას შექმნის, მშენებლობის პროცესი კი ამაღლების და ასათიანის ქუჩებზე მდებარე ავარიულ სახლების მდგომარეობს კიდევ უფრო დაამძიმებს.

საკრებულომ სოლოლაკის ფერდობს რეკრეაციულ-ლანდშაფტური ზონის სტატუსი გასული წლის ბოლოს შეუცვალა. პარალელურად, ქედზე "პანორამა თბილისის" მოსამზადებელი სამუშაოები უკვე ჩატარებულია.

პროექტს „პანორამა თბილისის“ ფარგლებში ოთხი ახალი კომპლექსის აშენება იგეგმება - სოლოლაკის მაღლობი, სოლოლაკის ბაღები, თავისუფლების მოედანი და ერეკლე მეორის მოედანი.

პროექტის სრულმასშტაბიან სამუშაოებს თანაინვესტირების ფონდი, ეკონომიკის სამინისტროსგან ოფიციალური ნებართვის მიღების შემთხვევაში, მიმდინარე წელს განახორციელებს.