იმალებოდა თუ არა აეროპორტიდან "გამქრალი” "რემენა” ოზურგეთში და ვის ჰყავდა ის სამეფო პატივში

საზოგადოება - 15:19, 28 Jan, 2015

8234

"როდესაც კანონიერი ქურდი, “რემენა” აეროპორტიდან გაქრა, შემოქმედში იმალებოდა ის ადამიანი და სამეფო პატივში იყო. ოზურგეთის ფაქტიური მმართველი უწევდა მასპინძლობას” - აცხადებს ოზურგეთის მუნიციპალიტეტის საკრებულოს დეპუტატი ოპოზიციური პარტიიდან დავით მჟავანაძე.
მჟავანაძემ ეს განცხადება გუშინ "გურიის მოამბის” გადაცემა "მთავარ თემაში” გააკეთა და ქალაქის მერიაში არსებულ ნეპოტიზმთან დაკავშირებითაც ისაუბრა. როგორც მან აღნიშნა, რამდენიმე დღეში "ნაციონალური მოძრაობის” ოზურგეთის ორგანიზაცია ოფიციალურად გამოაქვეყნებს იმ ადამიანთა სიას, რომლებიც მერიაში ოზურგეთის "ფაქტიური მმართველის” საახლობლოს წარმოადგენენ.
"ოზურგეთს ჰყავს ფაქტიური მმართველი, რომელიც აკონტროლებს იმას, რომ თავისი კლანის წარმომადგენლები აკონტროლებდნენ აქ სიტუაციებს. მოიკითხეთ, ილა კეჭაყმაძის შვილიშვილის მომვლელის შვილი ჰყავთ თანამდებობაზე აყვანილი და ასეთი ფაქტი არის უამრავი, ნეპოტიზმი არის ყველა მიმართულებით. ილა კეჭაყმაძე არის ერთ-ერთი ის ადამიანი, რომელიც მომაგრებულია ოზურგეთის ფაქტიურ მმართველად და აკონტროლებს თავიდან ბოლომდე სიტუაციას. ნახეთ ქალაქის მერიაში ვინ არიან დასაქმებულები და ვისი ნათესავები არიან. უახლოეს დღეებში ოფიციალურად წარმოვადგენთ ამ ადამინების სიას”- განაცხადა მჟავანაძემ.

კანონიერი ქურდის, "რემენას" ე.წ. მასპინძელი, "პროგრეს ბანკის" სამეთვალყურეო საბჭოს თავმჯდომარის მოადგილე ილა კეჭაყმაძე 'ნაციონალური მოძრაობიდან" ოზურგეთის მუნიციპალიტეტის საკრებულოს დეპუტატის დავით მჟავანაძის მიერ გავრცელებულ ინფორმაციასთან დაკავშირებით, ჯერ-ჯერობით პოზიციას არ აფიქსირებს და ამბობს, რომ საპასუხო განცხადებას ის უახლოეს დღეებში ოფიციალურად გააკეთებს.

“აღნიშნულთან დაკავშირებით მე ვაპირებ გავაკეთო ოფიციალური განცხადება. შეიძლება ხვალ, ან უახლოეს დღეებში"-აღნიშნა კეჭაყმაძემ სატელეფონო საუბარში.

ვრცლად იხილეთ: გადაცემა "მთავარ თემაში"

თეა იოსელიანი - გურია