საპარტნიორო ფონდის მენეჯმენტი, რომელიც უნგრეთში სამუშაო ვიზიტით იმყოფებოდა, „ექსიმ ბანკის“ ხელმძღვანელ პირებს შეხვდა. მხარეებმა ურთიერთთანამშრომლობის პერსპექტივებზე ისაუბრეს, უნგრული ბანკის და ფონდის პროექტების პრეზენტაცია გამართეს, პრიორიტეტებსა და მიმდინარე პროექტებზე იმსჯელეს.

„ვიზიტი ნაყოფიერი იყო. უნგრული მხარე ინტერესით ადევნებს თვალს საქართველოს ეკონომიკაში მიმდინარე პროცესებს“, განაცხადა საპარტნიორო ფონდის აღმასრულებელმა დირექტორმა ირაკლი კოვზანაძემ.

ირაკლი კოვზანაძემ და „ექსიმ ბანკის“ აღმასრულებელმა დირექტორმა ზოლტან ურბანმა ორმხრივი თანამშრომლობის საკითხები, მათ შორის „ექსიმ ბანკისა“ და საპარტნიორო ფონდის მხრიდან საქართველოში ერთობლივი პროექტების დაფინანსების შესაძლებლობები განიხილეს. მხარეებმა ასევე ექსპორტის წახალისების მიმართულებით, როგორიცაა ექსპორტის ფინანსირება, დაზღვევა და გარანტიები ერთმანეთს გამოცდილება გაუზიარეს.

„ექსიმ ბანკის“ აღმასრულებელმა დირექტორმა ზოლტან ურბანმა აღნიშნა, რომ 2013 წლის შემდეგ ბანკმა დაიწყო რამდენიმე ქვეყანაში სხვადასხვა სააქციო ფონდებში ინვესტირება. შეხვედრაზე, საქართველოს ეკონომიკაში ინვესტირების ხელშესაწყობად, „ექსიმ ბანკისა“ და საპარტნიორო ფონდის მიერ ერთობლივი უნგრულ-ქართული ფონდის ჩამოყალიბების საკითხიც განიხილეს.

სამუშაო შეხვედრის შემდეგ საპარტნიორო ფონდსა და უნგრეთის „ექსიმ ბანკს“ შორის ურთერთთანამშრომლობის მემორანდუმი გაფორმდა.