„ისევ "გულაობს" რუსული დაზვერვა და დივერსანტ-ტერორისტები საქართველოში და ატარებს "ექსპერიმენტებს" ერის ფსიქიკაზე“ - წერს ნიკა რურუა „ფეისბუქის“ პირად გვერდზე და იური ვაზაგაშვილის მკვლელობას შემდეგი პოსტით ეხმაურება.

ნიკა რურუა: „ეს მკვლელობა, რომლის შესახებაც ახლა გავიგე, ანუ შვილის საფლავზე მისული მამის აფეთქების ამბავი, ძალიან ბნელით მოცული საქმეა, კიწმარიშვილის "თვითმკვლელობის" არ იყოს.

ვის შეეძლო ჩაედინა ასეთი რამ და ასე? რასაც არ უნდა ვფიქრობდეთ გარდაცვლილზე, შვილის საფლავზე მამის ასე ვერაგულად მოკვლა ძალიან ცინიკური და ცივსისხლიანი ვიღაცის ან ვიღაცეების დაგეგმილია, ბუნებრივია.

ეს ან მოკლულის პირადი მტერი უნდა იყოს, ანდაც ჩვენი ქვეყნის უვერაგესი მტერი, ვისაც მიზნად საზოგადოებაში დაპირისპირებისა და უკიდურესი დაძაბულობის მუხტის დათესვა სურს - რამდენად გამოუვა ეს, ეს სხვა საქმეა.

პირადად მე უფრო მეორე ვერსიისაკენ ვიხრები. ეს იმპერსონალური მკვლელობაა, რომელიც მოტივირებულია ხალხის სხვადასხვა ჯგუფებს შორის არეულობის გამოწვევისა და რაიმე სახის რადიკალიზმის გამოვლინების იმედით.

P.S. ისევ "გულაობს" რუსული დაზვერვა და დივერსანტ-ტერორისტები საქართველოში და ატარებს "ექსპერიმენტებს" ერის ფსიქიკაზე. ასე იცის სახელმწიფო ინსტიტუტების ნგრევამ და განზრახ დასუსტებამ.

ხშირად ვფიქრობ, რაში მდგომარეობს ე.წ. "რუსეთის ლეგიტიმური ინტერესები" საქართველოში და ყოველ ჯერზე შემდეგ დასკვნასთან მივდივარ სხვადასხვა გზით მეთოდით: კერძოდ, დასკვნასთან, რომ რუსეთს აქ რომელიმე ერთი ძალის გამარჯვება კი არ სურს, თუნდაც "თავისიანის" - არა. მას აქ ერთადერთი რამე უნდა - ის რომ ყოველთვის მეფობდეს უკიდურესი სიძულვილი და იყოს მაქსიმალური არეულობა, რომელიც ქვეყნის განვითარებას, განათლებას, გაზრდას შეუძლებელს გახდის.
დამეთანხმებით, ეს ინტერესი "ლეგიტიმური" ნამდვილად არაა.
ასე რომ, ნუ დავეხმარებით მტერს ამაში. ეს ჩვენ არ "გვაწყობს".