მან წარმოადგინა აგრეთვე, ეკონომიკური ზრდის მაჩვენებლები და განაცხადა, რომ 2012 წელის დეკემბერში დაფიქსირდა პირველი ვარდნა და მინუს 1,5% შეადგინა, რაც საგანგაშო ვითარებაა.
რაც შეეხება დღგ-ს ბრუნვებს, მერაბიშვილის თქმით, წინა წლის შესაბამის თვესთან შედარებით, 2012 წლის ოქტომბერში ეს მაჩვენებელი 6%-ს, ნოემბერში 3,6%-ს, ხოლო დეკემბერში კატასტროფული მაჩვენებელია და შეადგენს მინუს 5,2%-ს.
მერაბიშვილმა, ნაციონალური მოძრაობის ექსპერტებზე დაყრდნობით, განაცხადა, რომ ნოემბერ-დეკემბერში დაფიქსირდა ექსპორტის მაჩვენებლის ვარდნა, ნოემბერში მინუს 3,1%, დეკემბერში კი, მინუს 22,4%. ვარდნაა იმპორტის მაჩვენებლებშიც - ნოემბერში მინუს 4,7%, დეკემბერში კი - მინუს 9,1%.
რაც შეეხება სესხებსა და დეპოზიტებს, მერაბიშვილმა აღნიშნა, რომ 2011 წლის განმავლობაში შეინიშნებოდა ზრდა. კერძოდ, სესხები 2011 წელს იყო 4,2%, დეპოზიტები კი - 10,3%, 2012 წელს სესხები - 1,7%, დეპოზიტები - 2,1%.
მერაბიშვილის თქმით, ყველაზე მთავარი ისაა, რომ ხორციელდება ყოველდღიური და სისტემატიური ზეწოლა ბიზნესზე. ასევე, მისი თქმით, პოლიციამ ეკონომიკური დანაშაულის გამოძიება დაიწყო, რაც მისი მინისტრობის დროს პოლიციას აკრძალული ჰქონდა.
მეორე მიზეზად, გენერალურმა მდივანმა დღევანდელი მთავრობის ერთიანი მკაფიო გეგმის არარსებობა დაასახელა. კერძოდ, მისი თქმით ფერმერმა და გლეხმა არ იცი, რა არის მთავრობის ეკონომიკური პრიორიტეტები.
"არავინ იცის, თუ რა პრიორიტეტები აქვს საქართველოს მთავრობას და ცრუ დაპირებები ამცირებს ინვესტორების მზაობას ინვესტიციების განხორციელებასთან დაკავშირებით", - აღნიშნა მერაბიშვილმა.
ვანო მერაბიშვილმა განაცხადა, რომ თუ ახალმა მთავრობამ დროულად არ მიიღო ზომები, საფრთხე არა მხოლოდ ამჟამინდელი მთავრობის გეგმებს, არამედ წინა ხელისუფლების დროს დაგეგმილ პროექტებსაც დაემუქრება.