თებერვალში, სტამბოლის ცენტრში ქართული კაფე „გალაკტიონი" გაიხსნება. კაფე სტამბოლის ტურისტულ არეალში მდებარეობს და აქედან გამომდინარე, მისი დამფუძნებლები ბევრ უცხოელ სტუმარს ელოდებიან. თუმცა, მიუხედავად ამისა, ობიექტი ყველა სეგმენტზე იქნება გათვლილი და ქართული ტრადიციული კერძების, მათ შორის ხინკლისა და ხაჭაპურის დაგემოვნება ყველასათვის ხელმისაწვდომ ფასად იქნება შესაძლებელი.

კაფის ხელმძღვანელობის განცხადებით მათი მიზანია ყველა ადამიანმა, ვისაც საქართველოს შესახებ ინფორმაცია აქვს, რესტორანში ვიზიტის შემდეგ ქვეყნით უფრო მეტად დაინტერესდეს და მეტი გაიგოს მისი კულტურისა და სამზარეულოს შესახებ.

„გალაკტიონი" ბეიოღლუს უბანში, გალათას კოშკის მიმდებარე ტერიტორიაზე განთავსდება.

კაფის მეპატრონე ნაილი ვექილი კი აცხადებს, რომ სტამბოლში ქართული სამზარეულოთი ინტერესი ყოველთვის იგრძნობოდა და კაფის გახსნასთან დაკავშირებითაც საუბარი დიდი ხნის განმავლობაში მიმდინარეობდა.