უცნობი ფიროსმანი - „ნადირობა ინდოეთში“, პირველად ფართო საზოგადოების წინაშე

კულტურა - 14:57, 15 Jan, 2015

1241

დღეს საქართველოს ეროვნული მუზეუმის შალვა ამირანაშვილის სახელობის ხელოვნების მუზეუმში ნიკო ფიროსმანის ნამუშევრის ,,ნადირობა ინდოეთში” პრეზენტაცია შედგა. ნიკო ფიროსმანის ,,ნადირობა ინდოეთში“ სრული სახით პირველად გამოიფინა.

ხელოვნების მუზეუმის თანამედროვე ქართული ფერწერის საინვენტარო წიგნში არსებული ჩანაწერის მიხედვით ,,ნადირობა ინდოეთში” მუზეუმმა 1930 წელს მწერალ სერგო კლდიაშვილისგან შეიძინა. სურათის ზედა ნაწილიდან ამოჭრილი იყო ფრაგმენტი მიმავალი მამაკაცის ფიგურით. მუზეუმმა მოგვიანებით, ეს ფრაგმენტიც შეიძინა. შეძენის თარიღი და მფლობელის ვინაობა ცნობილი არ არის.
,,ნადირობა ინდოეთში” პირველად 1930 წელს მოსკოვში, ნატიფ ხელოვნებათა მუზეუმში გამართულ გამოფენაზე იყო წარმოდგენილი. სურათიდან ამოჭრილი ფრაგმენტი უკანასკნელად 1938 წელს გამოიფინა, თბილისში, მეტეხის მუზეუმში მოწყობილ გამოფენაზე. დიმიტრი შევარდნაძის დახვრეტის შემდგომ, ტილოს ძირითადი ნაწილი დახვეულ მდგომარეობაში ინახებოდა ფონდში. 1970-იან წლებში იყო მცდელობა რესტავრაციისა, თუმცა სურათის მძიმე დაზიანებების გამო პროცესის დაწყება ვერ მოხერხდა.

სარესტავრაციო მოსამზადებელი სამუშაოების პირველი ეტაპი დაიწყო 2004 წელს, ხოლო 2014 წელს განხორციელდა ნამუშევრის რესტავრაცია. ნამუშევრის ,,ნადირობა ინდოეთში” რესტავრაცია შესრულდა საქართველოს ეროვნული მუზეუმის რესტავრატორების ნანა მანაგაძისა და ეველინა კარსელის მიერ. რესტავრაციის ურთულესი პროცესის დასრულების შემდეგ ,,ნადირობა ინდოეთში” პირველად იფინება სრული სახით.

გამოფენა გაგრძელდება 2015 წლის 31 იანვრამდე.

მისამართი: შალვა ამირანაშვილის სახელობის ხელოვნების მუზეუმი, ლადო გუდიაშვილის ქუჩა 1.