უპირველეს ყოვლისა, ჩვენ თვითონ ფერი უნდა ვიცვალოთ- ილია მეორე

საზოგადოება - 13:18, 14 Jan, 2015

1534

სრულიად საქართველოს კათოლიკოს-პატრიარქმა სიონის საკათედრო ტაძარში ახალი წლის დადგომასთან დაკავშირებით გამართული პარაკლისის შემდეგ მრევლს ქადაგებით მიმართა, ილია მეორემ მოსახლეობას წმინდა ბასილი დიდის ხსენების დღე და ახალი წელი მიულოცა და საქართველოს და მთელ მსოფლიოს მშვიდობა, სიხარული და სიყვარული უსურვა.

„ყოველ ახალ წელს ადამიანი ახალ მადლს და ღვთისგან წყალობას ელოდება. ჩვენ შევთხოვთ უფალს, რომ წყალობა არ მოგვაკლოს და გაამთლიანოს საქართველო, გაამთლიანოს ჩვენი ქვეყანა. უპირველეს ყოვლისა, ჩვენ თვითონ ფერი უნდა ვიცვალოთ, უნდა ჩავხედოთ ჩვენს გულს, სულსა და გონებას“,- განაცხადა პატრიარქმა.

მისივე თქმით, ხშირად, მიუხედავად იმისა, რომ ადამიანი ლოცულობს, ვერ აკონტროლებს თავის ქმედებას და ზოგჯერ ბოროტებასაც კი აკეთებს.

ილია მეორის განმარტებით, ერთია, როცა ადამიანი ბოროტებას შემთხვევით, თავისი უძლურების გამო აკეთებს, თუმცა არის შემთხვევები, როცა ამას განზრახ ჩადის.

„ეს ადამიანი საცოდავია და ღვთისგან დაისჯება. უნდა გვახსოვდეს, რომ ყოველი ადამიანი რასაც აკეთებს, კეთილსა თუ ბოროტს, თავის თავს უკეთებს და არავის სხვას. ასე რომ, ნუ გავუკეთებთ ჩვენს თავს ბოროტებას, ვეცადოთ სიკეთე ვაკეთოთ, რომელიც ათმაგად დაგვიბრუნდება“,- აღნიშნა კათოლიკოს-პატრიარქმა.

პატრიარქმა იმ დიდი წყალობისთვის , რასაც საქართველოს აძლევს, უფალს მადლობა გადაუხადა.

„დალოცვილი იყოს თქვენი ოჯახები, ჩვენი შვილები, ჩვენი წარსული და მომავალი. შევთხოვოთ უფალს , რომ მომავალშიც ნუ მოაკლებს საქართველოს თავის წყალობას“,-აღნიშნა ილია მეორემ ქადაგებისას.