ლეგენდარული ქართველი პრიმადონა მეგობრის დაკრძალვაზე მოსკოვში მიიწვიეს

საზოგადოება - 12:55, 13 Jan, 2015

1841

ცნობილი საოპერო მომღერალი ელენა ობრაზცოვა 75 წლის ასაკში გერმანიაში გარდაიცვალა. მომღერლის გარდაცვალების მიზეზად გულის გაჩერება სახელდება.
„თავზარდაცემული და ძალიან დამწუხრებული ვარ ჩემი დიდი მეგობრისა და ძვირფასი კოლეგის, მსოფლიო მომღერლის ელენა ობრაზცოვას გარდაცვალების გამო !!! - განუცხადა „ნიუპოსტს“ ქართველმა საოპერო დივამ ცისანა ტატიშვილმა.
მეცო სოპრანოს გარდაცვალებასთან დაკავშირებით მას მოსკოვიდან შემდეგი სიტყვებით დაურეკეს: „ოჯახმა სურვილი გამოთქვა, რომ დაესწროთ ელენა ობრაზცოვას დაკრძალვას, როგორც მისი მეგობარი და ერთ-ერთი საუკეთესო პარტნიორი, გზისა და სასტუმროს ხარჯებს მოსკოვის მერია უზრუნველყოფს".
ცისანა ტატიშვილი:„ჩვენ მრავალი წელი ერთად ვმღეროდით სპექტაკლებში თბილისში, მოსკოვსა თუ პეტერბურგში და ყოველთვის აღმაფრთოვანებდა მისი უნიკალურობა, არაჩვეულებრივად ძლიერი და ლამაზი ხმა, ზუსტი, უტყუარი შემოქმედებითი ინტუიცია, იმპროვიზაციული თავისუფლება, ექსპრესიულობა, მომხიბვლელი გარეგნობა. იგი, იყო სამაგალითო მეგობარი, ბრწყინვალე პარტნიორი და ბედნიერებას ანიჭებდა, მუდამ ახარებდა კოლეგების წარმატება!!! ვუთანაგრძნობ მის ოჯახს, სრულიად მუსიკალურ საზოგადოებას, დიდი თეატრის კოლექტივს, მის მეგობრებსა და კოლეგებს მსოფლიოს ყველა ქვეყანაში!!!“
მსოფლიოში საუკეთესო კარმენად აღიარებულ მომღერალს მოსკოვის, დიდ თეატრში გამოემშვიდობებიან.