აუქციონის სახლი "Goldin Auctions" მორიგ გაყიდვას აწყობს, სადაც ძირითად ლოტებად ცნობილი მსახიობის ალ პაჩინოს "Tony Awards"-ის 10 ათას დოლარად შეფასებული და „ოქროს გლობუსის" 25 ათასს დოლარად შეფასებული სტატუეტები იქნება წარმოდგენილი.

ონლაინ აუქციონის ორგანიზატორები დარწმუნებულნი არიან, რომ პრიზები ბევრად უფრო ძვირად გაიყიდება, რადგან "Tony Awards"-ის და "ოქროს გლობუსის", ისევე როგორც "ოსკარის" ფიგურები ძალიან იშვიათად ხვდება აუქციონებზე, რაც იმითაა განპირობებული, რომ პრემიის ლაურეატებს არ აქვთ მათი გაყიდვის უფლება. იმ შემთხვევაში კი, თუ მფლობელს აღარ შეუძლია მისი შენახვა, ის ვალდებულია პრიზი იმ ორგანიზაციას დაუბრუნოს, რომლისგანაც თავის დროზე მიიღო. ალ პაჩინოს შემთხვევაში მსგავსი აკრძალვა არ ვრცელდება, რადგან მსახიობი მანამდე დაჯილდოვდა აღნიშნული პრიზებით, სანამ კანონი ძალაში შევიდოდა.

"Tony Awards" ალ პაჩინომ 1969 წელს მიიღო მამაკაცის მეორეხარისხოვანი საუკეთესო როლის შესრულებისთვის ბროდვეის მიუზიკლში "ატარებს კი ვეფხვიი ჰალსტუხს?" "ოქროს გლობუსი" კი, 1973 წელს დაიმსახურა პოლიციელის როლისთვის ფილმში "სერპიკო".

როგორც ცნობილია, თავისი პრიზები მსახიობმა კინოპროდიუსერს - მარტინ ბრეგმანს აჩუქა და სწორედ მან გამოიტანა სტატუეტები აუქციონზე გასაყიდად. სხვა ლოტებს შორის ჰოლივუდის ვარსკვლავის კიდევ ერთი საჩუქარი - "Rolex"-ის საათი თავისი გრავირებით "მისტერ ბის სიყვარულით მისტერ პისგან", ფრენკ სინატრას მეზღვაურის კოსტიუმი 1945 წლის ფილმიდან "ასწიეთ ღუზები" და პიტერ ლოუფორდის ენოტის მანტოა 1948 წლის ფილმიდან "სააღდგომო აღლუმი".

ონლაინ აუქციონი 12 იანვრიდან 7 თებერვლამდე გაგრძელდება.

წყარო: http://fortuna.ge/