დეპუტატებისგან განაწყენებულ შავაძეებს შვილის ოპერაცია ბიზნესმენმა დაუფინანსა

საზოგადოება - 22:24, 08 Jan, 2015

1466

თამუნა შავაძეს დეკემბრის ბოლოს თბილისის ერთ-ერთ კლინიკაში ღეროვანი უჯრედის გადანერგვა გაუკეთდა. ის ახლა შემდგომი რეაბილიტაციისთვის ემზადება. როგორც თამუნა ,,ნიუპოსტთან“ საუბრობს, მას ფეხებსა და ხელის თითებში მგრძნობელობა უბრუნდება.

,,გურიის მოამბის" ვებგვერდზე გასულ თვეში გასული წერილის შემდეგ, სადაც შავაძეები ოზურგეთის მაჟორიტარ დეპუტატსა და პარლამენტის ჯანდაცვისა და სოციალური კომიტეტის თავმჯდომარე დიმიტრი ხუნდაძეს ტყუილ დაპირებებში ადანაშაულებდნენ, ახალგაზრდა გოგონას პრობლემაზე სიუჟეტი ,,რუსთავი 2“-მა მოამზადა.

გასული სიუჟეტის შემდეგ, ოჯახს დახმარება ცნობილმა ბიზნესმნმა ჯონი გიგანმა და მისმა მეუღლემ, თაკო ჩარკვიანმა გაუწიეს.

თამუნას წლების შემდეგ ღეროვანი უჯრედის მეორედ გადანერგვა ,,არამიანცის" კლინიკაში ჩაუტარდა.

"გარდა იმისა, რომ ოპერაციის თანხა გაიღო, ყოველ დღე მოდიოდა ჩვენს სანახავად და საჩუქრები მოჰქონდა. უდიდეს მადლობას ვუხდი ქალბატონ თაკოს და მის მეუღლეს. ყველა იმ ადამიანს, ვინც ჩემი პრობლემა გულთან ახლოს მიიტანა და დამეხმარა. საგრძნობლად გაუმჯობესდა ჩემი მდგომარეობა. ფეხებსა და ხელის თითებში მგრძნობელობა ნელ-ნელა მიბრუნდება. ახლა რეაბილიტაციის კურსი მჭირდება".

თამუნას თქმით, მისთვის საჭირო სარეაბილიტაციო კურსის ჩატარებაზე სურვილი თბილისში, დავით ტატიშვილის კლინიკაში გამოთქვეს.

რაც შეეხება რეაბილიტაციისთვის საჭირო თანხებს, ამ ეტაპზე მხოლოდ 1500 ლარი აქვთ, რომელიც ოჯახს ჯანდაცვის სამინისტროდან ერთი თვის წინ გადაურიცხეს, დანარჩენი თანხის მოძიებაში კი, როგორც თავად ამბობს, დახმარებას ისევ ბიზნესმენები დაპირდნენ.

ბოლო ორი წლის განმავლობაში შავაძეების მიერ ჯანდაცვის სამინისტროში რამდენიმე წერილი გაიგზავნა, ოჯახი თამუნას ოპერაციისთვის საჭირო თანხას ითხოვდა, თუმცა ყველა მათგანი უკან უარით უბრუნდებოდათ: ,,არასაკმარისი ფინანსების გამო, ამ ეტაპზე ვერ ხერხდება თქვენი მოთხოვნის დაკმაყოფილება“.

თეა იოსელიანი-გურია