საქართველო უახლოეს რამდენიმე წელიწადში შესაძლოა შეშის რესურსის გარეშე დარჩეს.

„რეზონანსის“ ინფორმაციით, საფრთხე რეალურია შიდა ქართლში, სადაც მარაგი თითქმის ამოწურულია. სახელმწიფომ კი, ალტერნატიულ ენერგიაზე ძალიან სწრაფად უნდა იზრუნოს.

ღია გარემოსდაცვითი სამოქალაქო ინიციატივის კოორდინატორი ქვემო ქართლის რეგიონში გიორგი დემურაშვილი განმარტავს, რომ შეშის მარაგის მხრივ პრობლემა მთელ საქართველოშია, რაც დიდ ეკოლოგიურ საფრთხეს გამოიწვევს.

„ქვეყნის მასშტაბით შეშის მარაგი ან ამოწურულია, ან ამოწურვის ზღვარზეა. რესურსი თითქმის აღარ არსებობს ქვემო ქართლში, პრობლემაა კახეთში, სამცხე-ჯავახეთში, მცხეთა-მთიანეთში, აჭარასა და სამეგრელოში. მოსახლეობისმოთხოვნა შეშაზე რეალურად არსებულ რესურსს ბევრად აღემატება“, - აცხადებს დემურაშვილი.

მისივე თქმით, ყოველწლიურად 100 ათას კბ/მ-ზე მეტი შეშის არალეგალურად მოპოვება ტყის ეკოსისტემას დიდ ზიანს აყენებს, რაც უკვე მოსახლეობის ყოფით პრობლემაზეც აისახება.

ქვემო ქართლში შეშის ალტერნატიულ წყაროდ ძირითადად, გაზიფიცირებას განიხილავენ. ცალკეულ მუნიციპალიტეტებში ასევე, საუბრობენ მზის ენერგიის გამოყენებაზეც საბიუჯეტო დაწესებულებებში, განსაკუთრებით სკოლებსა და საბავშვო ბაღებში.

წყარო „რეზონანსი“