ბათუმის პორტის ადმინისტრაციის შენობასთან საპროტესტო აქცია გაიმართა. ადგილზე შეკრებილების ინფორმაციით, ისინი 31 დეკემბერს ყოველგვარი ახსნა-განმარტების გარეშე სამსახურიდან გაათავისუფლეს. უკვე ყოფილი თანამშრომლები სამუშაო ადგილებზე აღდგენას ითხოვენ.

პორტის ხელმძღვანელობის ინფორმაციით თანამშრომლებს კონტრაქტი არ შეწყვეტიათ. მათი თქმით, 31 დეკემბერს ხელშეკრულებებს ვადა გაუვიდათ.

ბათუმის პორტის დირექტორის მოვალეობის შემსრულებლის ლევან ჯობავას თქმით, თანამშრომლები მას შემდეგ დაბრუნდებიან სამსახურში, რაც პორტის ტვირთბრუნვა გაიზრდება.

„ტვირთბრუნვის გაზრდის შემდეგ ამ ხალხს ის ხელშეკრულებები აღუდგებათ და ამ სამი თვის განმავლობაში ჩვენ მათ მივცემთ კონპენსაციას 200 ლარის ოდენობით და ვუტოვებთ სამედიცინო დაზღვევას“, - განაცხადა ჯობავამ.