„ღმერთმა დალოცოს, გაამთლიანოს და გააძლიეროს საქართველო“- პატრიარქმა მრევლთან ერთად ილოცა

საზოგადოება - 20:36, 03 Jan, 2015

1976

სრულიად საქართველოს კათოლიკოს-პატრიარქის, უწმინდესისა და უნეტარესი ილია მეორის დაბადების დღესთან დაკავშირებით, საპატრიარქოში მოქალაქეების მიღება გაიმართა. ხალხის სიმრავლის გამო მოქალაქეთა მიღება საპატრიარქის ეზოში გაგრძელდა.

მოქალაქეთა მიღებას სასულიერო პირები, ჩოხოსნები და სხვადასხვა პროფესიის ადამიანები დაესწრნენ.

როგორც ჟურნალისტებს პატრიარქის მდივანმა, მამა მიქაელ ბოტკოველმა განუცხადა, პატრიარქის დაბადების დღისადმი მიძღვნილ ღონისძიებაზე მოქალაქების მიღება პატრიარქის ტრადიციაა, რომელსაც არ არღვევს.

„შეიძლება, პატრიარქი მთელი დღე მოქალაქეებს იღებდეს. ის ამ ტრადიციას არ არღვევს, რადგან ხედავს, რომ მოქალაქეებს პატრიარქთან შეხვედრის დიდი სურვილი აქვთ“, - განაცხადა მამა მიქაელბოტკოველმა.

პატრიარქმა მოქალაქეები დალოცა და ღვთისმშობლის ლოცვა საპატრიარქოს ეზოში შეკრებილ მოქალეებთან ერთან სამჯერ წარმოთქვა.

„ღმერთმა დალოცოს, გაამთლიანოს და გააძლიეროს საქართველო“, - მიმართა უწმინდესმა მოქალაქეებს.

მოქალაქეთა მიღებაზე საგალობლები შესრულდა.

საპატრიარქოში დღეს სრულიად საქართველოს კათოლიკოს-პატრიარქის, უწმინდესისა და უნეტარესის ილია მეორის დაბადების დღისადმი მიძღვნილი ღონისძიება გაიმართა. ღონისძიებას მომღერლები, მხატვრები, ექიმები და სხვადასხვა პროფესიის ადამიანები დაესწრნენ. მათ პატრიარქს დაბადების დღე მიულოცეს და საჩუქრები გადასცეს. ამასთან, ღონისძიებაზე საშობაო სიმღერები და სხვადასხვა კომპოზიციები შესრულდა.