„მე შემიძლია გაქციოთ მსოფლიო ვარსკვლავად, დამთანხმდით, გამომყევით პარიზში“...

კულტურა - 17:06, 30 Dec, 2014

2015

40- წლიანი შემოქმედებითი კარიერის განმავლობაში მას მრავალჯერ შესთავაზეს ევროპის მოწინავე საოპერო თეატრებში გადასვლა, მაგრამ მომღერალმა უარი თქვა ყველა მნიშვნელოვან, მისთვის მომგებიან წინადადებაზე და საბოლოოდ თავისი სამშობლოს და თბილისის ერთგული დარჩა...
ქართული ოპერის დრამატული სოპრანო და როგორც მას უწოდებენ განუმეორებელი ქართველი საოპერო პრიმადონა ცისანა ტატიშვილი (30 დეკემბერი) იუბილარია.

სახალხო არტისტი, რ. შტრაუსის "სალომეა"-ს პირველი შემსრულებელია ყოფილ საბჭოთა კავშირში და მონსერატ კაბალიესთან და ბირგიტ ნილსონთან ერთად, ერთ-ერთი პირველი მსოფლიოში.

ცისანა ტატიშვილი: „მიუნჰენში ერთ-ერთი გასტროლის დროს სპექტაკლის შემდეგ ჩემთან შემოვიდნენ ბაზელის, კიოლნის, ბერლინისა და ბონის თეატრების დირექტორები და მთხოვეს, მათთან მემღერა ''ტრუბადური'' .
„გოსკონცერტთან'' შეუთანხმებლად ვერ დავთანხმდებოდი, ხოლო როცა მოსკოვში დავრეკე, მიპასუხეს: ''დაბრუნდით, თორემ ვეღარასოდეს ეღირსებით ვერც ერთ გასტროლს''. ბევრი მაცდური შემოთავაზების მიუხედავად, ვერც სამშობლო დავტოვე და არც ოჯახი გავიმეტე სამუდამო წვალებისთვის. დავრჩი ჩემი თბილისის ერთგული.
ინდივიდუალური გასტროლებით ხშირად ჩავდიოდი ევროპის დედაქალაქებში და წამყვან თეატრებში ვმღეროდი. მახსოვს, პარიზის ''გრანდ ოპერის'' მენეჯერმა მომისმინა ბერლინში, სპექტაკლის შემდეგ ის ჩემთან მოიყვანეს. მან ასეთი რამ მითხრა: ''მე შემიძლია გაქციოთ მსოფლიო ვარსკვლავად, დამთანხმდით, გამომყევით პარიზში, იქ არაჩვეულებრივ პირობებს შეგიქმნით. დილის 6 საათზე სასტუმროს ეზოში დაგელოდებათ მანქანა, რომელიც აეროპორტში მოგიყვანთ, იქ მე დაგხვდებით და ერთად წავალთ''.შთამბეჭდავი წინადადება იყო, დავფიქრდი, მაგრამ ისევ ოჯახი დამიდგა თვალწინ. გამახსენდა, როგორ დააპატიმრეს და დახვრიტეს ''დიდი თეატრიდან'' წასული სოლისტების ოჯახის წევრები და კატეგორიული უარი ვთქვი გავყოლოდი მას.
ბოლოს 90-იან წლებში ვიყავი ლონდონსა და ვენაში ინდივიდუალური კონცერტებით. ლონდონში ჩემმა აგენტმა ''კოვენტ-გარდენის'' დირექტორთანაც მომიწყო მოსმენა. დამინიშნეს თერთმეტი სპექტაკლი ''ტოსკა'' , მაგრამ თბილისში სამოქალაქო ომი დაიწყო და გამგზავრება ვეღარ შევძელი. მსგავსი ხელისშემშლელი მომენტი ბევრი იყო“...

ქალბატონ ცისანა ტატიშვილს ევროპის პრესტიჟულ სცენებზე, შესრულებული აქვს წამყვანი პარტიები ოპერებში:- ჯ. ვერდი "აიდა" (აიდა, ამნერისი), "ოტელო"- (დეზდემონა), „ტრუბადური"- (ლეონორა), "ბალ მასკარადი"- ( ამელია), ,,დონ კარლოსი"- (ებოლი), მოცარტი-" დონ ჟუანი"- (დონა ანნა), მასკანი- "სოფლის პატიოსნება"- (სანტუცა), შტრაუსი- "სალომე" –(სალომე), ვაგნერი- "მფრინავი ჰოლანდიელი", "ლოენგრინი"- (სენტა, ჰერტრუდა), პ. ჩაიკოვსკი-"პიკის ქალი"-(ლიზა), ზ. ფალიაშვილი „აბესალომ და ეთერი", „დაისი“-(ეთერი, მარო)

ცისანა ტატიშვილის სახელობის ვარსკვლავი 2010 წელს გაიხსნა თბილისის ოპერის წინ.

შოთა რუსთაველისა და ზაქარია ფალიაშვილის სახელობის პრემიების ლაურეატი, თბილისის საპატიო მოქალაქე, ბრწყინვალების საპრეზიდენტო ორდენის კავალერი, ღირსების ორდენოსანი, საქართველოსა და საბჭოთა კავშირის სახალხო არტისტი ცისანა ტატიშვილი თბილისის სახელმწიფო კონსერვატორიის ვოკალური კათედრის პროფესორი და შვეიცერის ორდენის კავალერია.