„უკვე მესამე წელია დეკემბერში ასე ხდება, რა ვიღონოთ? რა უნდა ვქნათ“? - კითხულობენ აფორიაქებული თბილისელები და ყაზტრანსგაზის ქვითარზე დაფიქსირებულ მაღალ გადასახადებს აპროტესტებენ. მოქალაქეების განცხადებით, მათ ბუნებრივი აირის მრიცხველები უსირცხვილოდ ძარცვავენ.

სოციალურ ქსელში, ერთ-ერთი ასეთი დაზარალებული პირის მიერ, გავრცელებული პოსტიდან ირკვევა, რომ გასული თვისგან განსხვავებით ამჯერად გადასახადმა 3,5 - ით იმატა, - „კლასიკური გადამგდებლები არიან“, - აცხადებს ყაზტრანსგაზის აბონენტი.

"გაზის გადასახადი მომივიდა 3,5 ჯერ მეტი ვიდრე წინა ქვითარში 77 ლარი, ეხლა 292 ლარი. შევამოწმე მრიცხველი, მწყობრშია, მშვენივრად მუშაობს. ასეთი მაიმუნობა შარშან წინ კეთდებოდა, ნახევარი ქალაქი "გადაგდებულში" იყო და ვერავინ ვერაფერი ვერ ქნა.
შეიტყაპუნეს... ეხლა რა ხდება? უფრო თავხედურად ,,გვპარსავენ?" რამდენიმე ნაცნობმაც ანალოგიური დამიდასტურა და გაოგნებულია.

ერთმა მითხრა : წინა ქვითარი 47 ლარი იყოო და ეხლანდელი 276ლ. როდესაც მივედი მიროტაძის ქუჩაზე, სადაც ეს ყველაფერი განვაცხადე და შეკითხვა დავუსვი როგორ მოვიქცე ამ ყველაფრის შემდეგ, ვის მივმართო-მეთქი. მივიღე ასეთი პასუხი : ,,ენერგეტიკის მინისტრს მიმართეთო, ვიცეპრემიერ კალაძესო" , - წერს დაზარალებული მოქალაქე.

დაზარალებული ბევრი აღმოჩნდა. „ნიუპოსტი“ შეეცადა გაერკვია თუ როგორ მოხერხდებოდა ამ პრობლემის მოგვარება და კახი კალაძის პრესსამსახურს დაუკავშირდა:

ირაკლი გაფრინდაშვილი: „ენერგეტიკის სამინისტროში წერილობით მოგვმართონ, ენერგეტიკის სამინისტრო იუსტიციის სახლშია და იქ ჩააბარონ წერილი. ამის შემდეგ შესაბამისი ორგანოები განიხილავენ და ყველაზე გვიან ორ კვირაში პასუხი ეცოდინებათ“.