ტელეკომპანია "მაესტრო" გადაცემა ,,ყოველდღიური აბების“ წამყვანმა ვასიკო ოდიშვილმაც დატოვა. ოდიშვილმა მის წასვლასთან დაკავშირებით განცხადება "მაესტროს" 6-საათიან საინფორმაციო გამოშვებაში გააკეთა:

"მოგესალმებით ძვირფასო ტელემომზირლებო, თქვენ უყურებთ ყოველდღიური აბებისა და ვასიკო ოდიშვილის განცხადებას, ამჯერად მე ცოტა უჩვეულო სიტუაციაში ვარ, რადგან ჩემს მიერ გაჟღერებული ეს განცხადება იქნება სერიოზული და ეს არ იქნება ხუმრობა.

ინფორმაცია იმის შესახებ , რომ მე და ჩემი გუნდი ვაპირებდით ტელეკომპანიის დატოვებას რამდენიმე კვირის წინ გავრცელდა. ამ ინფორმაციას ვადასტურებთ, თუმცა არხის დატოვებას „აბები“ გეგმავდა 2014 წლის 31 დეკემბერს. ანუ მას შემდეგ, რაც არხის წინაშე აღებულ ყველა ვალდებულებას შევასრულებდით.

შექმნილი დელიკატური მდგომარეობიდან გამომდინარე, არხის ხელმძღვანელობასთან შეთანხმებით, მივიღე გადაწყვეტილება, რომ ეს ნაბიჯი გადავდგა დღესვე და დავტოვო არხი.

დიდ მადლობას ვუხდი ტელეკომპანია „მაესტროს“ კომფორტული თანამშრომლობისთვის, ჩვენს ერთგულ მაყურებლებს კი დავამშვიდებ და ვეტყვი, რომ "ყოველდღიური აბები" არ გაქრება ტელესივრციდან, მე ჩემს მეგობრებთან ერთად , რომლებშიც მოიაზრებიან მაესტროს პირველი დამფუძნებლები , ვგეგმავ პოლიტიკურ-სატირული ტელეკომპანიის გაკეთებას, რომელსაც დაერქმევა "აბები". ამ არხზე თქვენ იხილავთ, როგორც "ყოველდღიურ აბებს" ვასიკო ოდიშვილისგან, ასევე ბევრ სხვა საინტერესო და ორიგინალურ პროექტს, ძალიან მალე უყურეთ ახალ ტელეკომპანია "აბებს" და გააკეთეთ თქვენი პოლიტიკური დასკვნები"- განაცხადა ვასიკო ოდიშვილმა "მაესტროს" ეთერში.