ახალი სპექტაკლი და მინისტრის დაპირება აზერბაიჯანულ თეატრს

კულტურა - 14:34, 22 Dec, 2014

2708

აზერბაიჯანულ სახელმწიფო თეატრის პრობლემებზე „ნიუპოსტი“ ჯერ კიდევ რამდენიმე თვის წინ წერდა. მაშინ ამ თეატრისთვის არავის ეცალა, მსახიობები კი შიშობდნენ და შენობის ავარიულ მდგომარეობასა და გაუსაძლის პირობებზე საუბრობდნენ.
როგორც გაირკვა მთავრობაში ცვლილებებმა აზერბაიჯანულ თატრზეც დადებითად იმოქმედა და ახლანდელმა კულტურისა და ძეგლთა დაცვის მინისტრმა მიხეილ გიორგაძემ, რომელიც თეატრს ესტუმრა და იქ არსებულ პრობლემებს პირადად გაეცნო თეატრის კოლექტივს შეძლებისდაგვარად დახმარება აღუთქვა.ეს კარგი სიახლე დასის წევრებს ძალინ ახარებთ და როგორც თავად ამბობენ შემართებაც ბევრად მეტი აქვთ. სანამ მინისტრი აღთქმულ დაპირებას სისრულეში მოიყვანს ჰ. ალიევის სახელობის თბილისის აზერბაიჯანულ სახელმწიფო პროფესიულ დრამატულ თეატრში პრემიერა თამაშდება. მაყურებელს თეატრი 23 დეკემბერს, 16:00 საათზე ელის. მოლიერის „ჟორჟ დანდენი, ანუ მოტყუებული ქმარი“ რეჟისორმა ზურაბ სიხარულიძემ დადგა და სპექტაკლში დასის აზერბაიჯანელ მსახიობებთან ერთად თურქი მსახიობებიც ითამაშებენ. ისინი საქართველოს შ. რუსთაველის სახელობის თეატრისა და კინოს სახელმწიფო უნივერსიტეტში თბილისის აზერბაიჯანული სახელმწიფო დრამატული თეატრის სამხატვრო ხელმძღვანელის, პროფესორ ზურაბ სიხარულიძის დოქტორანტები არიან.
კახი ლაზარიშვილი, აზერბაიჯანული თეატრის საინფორმაციო სამსახურის უფროსი:„სპექტაკლი, თავისი მხატვრული გადაწყვეტილებით, სრულიად განსხვავებული და თანამედროვე სტილით გამოირჩევა. თეატრის ისტორიაში ამ სტილის სპექტაკლი არის აბსოლუტურად ახალი სიტყვა, რაშიც მაყურებელი სპექტაკლის ნახვის შემდეგ თავად დარწმუნდება. რეჟისორმა ზურაბ სიხარულიძემ, მარტივი და ადვილად გასაგები ხერხებით შეძლო და სპექტაკლის ყველა ნიუანსი აბსოლუტურად გასაგები და მისაწვდომი გახადა თეატრის ყველანაირი მაყურებლისთვის“.