საბურთალოზე სექსუალური მანიაკი დადის!. ამის შესახებ გაზეთი "კვირის ქრონიკა" წერს.

გამოცემის ინფორმაციით, მანიაკის შესახებ ისტორიები რედაქციაში მისულმა გოგონებმა მოყვნენ.

ყაზბეგის გამზირზე სექსუალური მანიაკი დადის!

"სამი დღის წინ, დილით, დაახლოებით თერთმეტ საათზე, სამსახურში მიმავალ ნ-ს, ალ. ყაზბეგის გამზირის მიმდებარე ტერიტორიაზე, "წითელი პარკის" მახლობლად, სამათხოვროდ ხელგამოწვდილი ახალგაზრდა მამაკაცი (ოცი-ოცდაათი წლის) გადაუდგა. გოგონამ ხურდის არქონის გამო, ჟესტიკულაციით ანიშნა ბიჭს, ვერ დაგეხმარებიო და გზა განაგრძო. რამდენიმე ნაბიჯის გავლის შემდეგ, გოგონამ ზურგიდან მოულოდნელი თავდასხმა იგრძნო. მათხოვარი მას თმაში სწვდა და მისი ბუჩქებისკენ გათრევას ცდილობდა... ნ-მ ხმამაღლა დაიწყო ყვირილი და გამვლელებს დახმარება სთხოვდა... სამწუხაროდ, როგორც დაზარალებული ამბობს, ქუჩაში არც ერთ გამვლელს არ უცდია, მანიაკის მიერ დატყვევებულისთვის დახმარება აღმოეჩინა(!). რამდენიმეწუთიანი "ორთაბრძოლის" შემდეგ, გოგომ თმაში ჩაფრენილი ბიჭი როგორღაც მოიგერია და მართალია, ისტერიკულ მდგომარეობაში, მაგრამ მაინც მოახერხა და თავს გაქცევით უშველა.

სამსახურში მისვლისთანავე, ნ-ს თანამშრომლებმა მოუარეს და დააწყნარეს. აღმოჩნდა, რომ ერთ-ერთ თანამშრომელ გოგონასაც მსგავსი ინციდენტი ცოტა ხნით ადრე შეემთხვა. მანიაკის გარეგანი აღწერილობის შედარების შემდეგ, გოგონები მიხვდნენ, რომ მათ ერთი და იგივე პირი დაესხა თავს. მეორე შემთხვევაში, ახალგაზრდა კაცი შარვალჩახდილი გადაუდგა კ-ს, რომელსაც "ფიზიკური სიახლოვე" მოსთხოვა. გოგონამ კივილი დაიწყო, ბიჭი, როგორც ჩანს, უარმა გააბრაზა, გოგონას გაუპატიურებით დაემუქრა და ასე შარვალჩახდილივე გამოეკიდა...

მოკლედ, შეშინებულმა გოგონებმა გადაწყვიტეს, პატრულისთვის მიემართათ. პატრული "როგორც იქნა, მოვიდა", ოქმი გააფორმა და ჩვენებები ჩაიბარა. დაზარალებულებს კი დაჰპირდა სამორიგეო საპატრულო ჯგუფის გამოგზავნას, რომელიც თავდამსხმელს აუცილებლად დაიჭერდა.

სამწუხაროდ, დაზარალებულებს მთელი დღის განმავლობაში არ შეუნიშნავთ არც სამორიგეო საპატრულო მანქანა და ეკიპაჟი და არც ქვეითი პოლიციის თანამშრომლები(!). შემთხვევიდან გასულია რამდენიმე დღე და გოგონებს სამართალდამცავი ორგანოდან არავინ შეხმიანებიათ(!).

ტერიტორია, სადაც ზემონაამბობი შემთხვევა მოხდა, საბედნიეროდ თუ საუბედუროდ, საბავშვო ბაღებით, საჯარო, თუ კერძო სკოლებითა და სასწავლო დაწესებულებებითაა დატვირთული(!). ალ. ყაზბეგის გამზირის ამ მონაკვეთს, საიდანაც "წითელი პარკი" იწყება, საირმის გორის მიმართულებით შეჭრილ ქუჩას, რამდენიმე დღის განმავლობაში დაზარალებული გოგონების ახლობლები აკვირდებოდნენ. დადარაჯებული, სამორიგეო საპატრულო ეკიპაჟი კი არა, კაციშვილის ჭაჭანება არ ყოფილა", - ნათქვამია სტატიაში.

წყარო: გაზეთი "კვირის ქრონიკა"