საქართველოს ექს-პრემიერის ბიძინა ივანიშვილის ინფორმაციით, იგი თბილისის ზოოპარკის დაფინანსებას აპირებდა.

ამის შესახებ ივანიშვილმა გადაცემაში „მშვიდობით იარაღო“ განაცხადა.

„რამდენიმე წლის წინათ, როდესაც ჩემებმა დაიწყეს ზოოპარკთან ურთიერთობა, იჩივლეს, რომ უჭირთ ცხოველების გამოკვება. დახმარება მთხოვეს და მე ვუთხარი, რომ მთელ ზოოპარკს გამოვკვებავ თანამედროვედ, როგორც არის, ყველაფერს მოგცემთ, ოღონდ ყველანაირ დაფინანსებაზე სხვაზე უნდა თქვათ უარი. იმ წუთში ჩაიკეტნენ...მე უკვე ჭკუა ვისწავლე ამ მიმართულებით და შესაბამისად ვუთხარი, მე დაგეხმარებით, მაგრამ ეგრე არა, რომ გამოგიგზავნოთ რაღაც და მე არ ვიცოდე სად წავიდა. მთლიანად დავაკმაყოფილებ ზოოპარკს, რა თანხაც, როგორი ტიპის საკვებიც გინდათ შეუკვეთეთ, საუკეთესო, ოღონდაც უარი უნდა თქვათ ბიუჯეტის და სხვა ტიპის დაფინანსებებზე, ყველაფერზე. რა თქმა უნდა ჩემთან აღარ შემობრუნებულან ”, - განაცხადა ივანიშვილმა.