სკანდალი - "ჩამქრალი შუქი" და ერთი და იგივე ტესტებით ჩატარებული "კონკურსი"

საზოგადოება - 18:32, 20 Dec, 2014

2453

საჯარო მოხელეთა ტესტირება, ლანჩხუთში 13 დეკემბერს მიმდინარეობდა. ტესტირების დროს, საღამოს 5 საათზე სამივე სკოლაში (#1, #3 და შუხუთის საჯარო), სადაც ეს პროცესი მიმდინარეობდა, შუქი გამოირთო. რის გამოც, საჯარო მოხელეთა შესარჩევი კონკურსის ეს ეტაპი გადაიდო და ის, იმავე ტესტებით მეორე დღეს გაგრძელდა.

ამის შესახებ "გურიის მოამბეს" ლანჩხუთიდან აცნობეს.

ტესტირების დროს შუქის გამორთვას ადასტურებს საატესტაციო კომისიის თავმჯდომარე, გელა კილაძე.

კილაძე, "გურიის მოამბესთან" საუბარში, ასევე ადასტურებს, რომ, მეორე დღეს, ტესტირება, იგივე კონკურსანტებმა, იგივე ტესტებით გააგრძელეს.

აღსანიშნავია, რომ "გურიის მოამბეს" წყაროს ინფორმაციით, სანამ, კომისია, შუქის ჩაქრობის გამო, ტესტირების მეორე დღისთვის გადადების გადაწყვეტილებას მიიღებდა, კონკურსანტები, ნახევარი საათის განმავლობაში, ტესტებზე მუშაობდნენ.

გავრცელებული ინფორმაციით, სწორედ ეს ინცინდენტი გახდა იმის მიზეზი, რომ კონკურსანტთა უმრავლესობამ, მეორე დღეს ჩატარებულ ტესტირებაზე, ქულათა ლამის მაქსიმალური რაოდენობა-58-მიიღეს. რადგან ნებისმიერს შეეძლო ტესტების გადაწერა და მასზე სახლში, მეორე დღისთვის, დამოუკიდებლად მუშაობა.

გელა კილაძე:"შუქის ჩაქრობის გამო შეუძლებელი იყო გაგვეგრძელებინა ტესტირება, რაც შეეხება ტესტების გამოცვლას, ამას ჩვენ არ ვწყვეტთ და ამიტომ დარჩა იგივე. არა მგონია ეს გამხდარიყო მიზეზი მათი მაღალი შედეგებისა."