მას შემდეგ ხუთი წელი გავიდა. სააკაშვილის ხელისუფლებამ, 2009 წლის 19 დეკემბერს, ქუთაისში, დაგეგმილზე ორი დღით ადრე ბეტონის კონსტრუქცია-გამარჯვების მემორიალი ააფეთქა, რომელსაც დედა-შვილის სიცოცხლე შეეწირა.

დიდების მემორიალის აფეთქების შედეგად დაღუპული დედა-შვილის _ ეკა ცუცხვაშვილისა და მისი 10 წლის გოგონას, ნინო ჯინჭარაძის, გარდაცვალების გამო პასუხისმგებლობა სამ პირს დაეკისრა: კერძო კომპანია „საქფეთქმრეწვის“ ტექნიკურ დირექტორს _ ავთანდილ დარსაველიძეს, ამავე კომპანიის ქუთაისის უბნის უფროსს _ ელგუჯა გაბადაძესა და თბილისის უბნის უფროსს _ თენგიზ დარახველიძეს.

მათ ბრალი წაუყენეს სისხლის სამართლის კოდექსის 240-ე მუხლის მეორე ნაწილით გათვალისწინებული დანაშაულისთვის გაუფრთხილებლობის შედეგად უსაფრთხოების ნორმების დარღვევა, რამაც ადამიანის სიკვდილი გამოიწვია. თუმცა პასუხი არ უგიათ იმ პოლიტიკოსებს, რომლებმაც დიდების მემორიალის აფეთქების დანაშაულებრივი გადაწყვეტილება მიიღეს. „ქუთაისი თუდეი“ გარდაცვლილი 11 წლის გოგონას მამიდას, ნინო ჯინჭარაძეს დაუკავშირდა.

„5 წლის წინ ჩვენს ოჯახს დიდი ტრაგედია შეემთხვა. ჩემი რძალი ეკა ცუცხვაშვილი-37 წლის იყო, ხოლო ძმისშვილი ნინო ჯინჭარაძე-10 წლის. ძალიან მიჭირს 2009 წლის 19 დეკემბრის გახსენება.ერთადერთი რასაც ახლანდელ ქუთისის მერს შოთა მურღულიას და საკრებულოს თავმჯდომარეს დავით დვალს ვთხოვთ, ტრაგიკულად დაღუპული ჩემი რძლის და ძმისშვილის სახელზე იქნებ მონუმენტი დადგან, ან ბინაზე ტრაფარეტი გააკეთონ, ან რაიმე რაც გარდაცვლილების სულის უკვდავსაყოფად იქნება,“-აღნიშნა ნინო ჯინჭრაძემ.

წყარო: http://kutaisitoday.com/?p=10247