დაავადებათა კონტროლისა და საზოგადოებრივი ჯანმრთელობის ეროვნული ცენტრი მოსახლეობას მოუწოდებს, პნევმოკოკური ინფექციის საწინააღმდეგო ვაქცინა ბავშვებს დროულად ჩაუტარონ. ამის შესახებ გაზეთი „ალია“ წერს.

როგორც გამოცემასთან საუბარში გადამდებ დაავადებათა დეპარტამენტის უფროსი, ხათუნა ზახაშვილის ამბობს, მშობლებს ყურადღება მართებთ, რადგან პნევმოკოკი განსაკუთრებით საშიშია 2 წლამდე ასაკის ბავშვებისთვის.

მისივე განმარტებით, რისკის ჯგუფებს წარმოადგენენ დღენაკლული, მცირეწონიანი და ქრონიკული დაავადებების მქონე ბავშვები.

„პნევმოკოკები ხველისა და ცემინების დროს გამოიყოფა და წვეთოვანი გზით ვრცელდება. ვერავინ ამოიცნობს ამ ბაქტერიას ლაბორატორიული კვლევის გარეშე. სიმპტომები გამოიხატება პნევმონიით, ანუ ფილტვების ანთებით, ბავშვებში ყურის ანთება, შუაყურის ანთება, ხშირია მენინგიტით, რომელიც ამ მიზეზითაა გამოწვეული. ყველამ ვიცით, ბავშვები ყველაზე ხშირად ფილტვების ანთებით ავადდებიან, ასევე ყურისა და შუაყურს ანთებითი დაავადებით. ამ ყველაფერს კი სწორედ პნევმოკოკი იწვევს, რომელსაც, თუ ავცრით, რისკს შევამცირებთ“ - ამბობს ზახაშვილი.