„საყდრისმა აჩვენა, რომ კიდევ ერთხელ დამარცხდა საზოგადოება “ - განაცხადა დღეს რატი ამაღლობელმა კავკასიის ეთერში, სწორედ რატის სიტყვებს გამოეხმაურა მწერალი თეონა დოლენჯაშვილი და პროტესტი „ფეისბუქის“ პირად გვერდზე გამოხატა. თავისი განცხადება მწერალმა ბალზაკის სიტყვებით დაიწყო.

თეონა დოლენჯაშვილი: „ზეცას რომ უტევ, მიზანში ღმერთი უნდა ამოიღო. კულტურას და მეხსიერებას რომ უტევ, მიზანში - საკუთარი ქვეყანა.
მადლობა ჩვენს ხელისუფალთ (ძველს, ახალს) რომ კიდევ ერთხელ წაგვიშალეს, დაგვიკარგეს, აგვიფეთქეს. რომ კიდევ ერთხელ დაამარცხეს საზოგადოება“.

ნიუპოსტთან საუბრისას კი მწერალმა შემდეგი კომენტარი გააკეთა.

თეონა დოლენჯაშვილი: „ზეცას რომ უტევ, მიზანში ღმერთი უნდა ამოიღო" ბალზაკის სიტყვებია, მისივე სიტყვებია ის რომ სისტემა აჩლუნგებს სინდისს, აცარიელებს ადამიანს და საბოლოო ჯამში, ქვეყანას“. ასეთი სისტემა თუ არ შეიცვალა და შეიცვალა მხოლოდ სახელები, ყოველთვის დამარცხდება ქვეყანა.

ჩემი მეგობრები, მწერლები - რატი ამაღლობელი, დათო ტურაშვილი, კოტე ჯანდიერი, გიორგი ლობჟანიძე, ბექა ქურხული, გაგა ნახუცრიშვლი, ეკატერინე ტოგონიძე და სხვები და სხვები, დამერწმუნეთ ბევრნი ვართ, ვეცდებით დავიცვათ ჩვენი კულტურა და ისტორია, საყდრისი დღეს სწორედ ამის სიმბოლოა. ჩვენ ვფიქრობთ, რომ ბრძოლას ყოველთვის აქვს აზრი და არის გადარჩენის შანსი“...