როგორც ცნობილია გიორგი კეკელიძის „გურულმა დღიურებმა“ უამრავთა მოწონება დაიმსახურა და დუნია აალაპარაკა. რამდენიმე ხნის წინ წიგნის პრეზენტაცია აჭარაშიც გაიმართა. ჰოდა, „გურული დღიურებით“ მოხიბლული და გურულებსა და გურიაზე შეყვარებული აჭარელი ქალბატონი მწერლისა და პოეტის „ფეისბუქის“ პირად გვერდზე შემდეგ წერილს აქვეყნებს.

„გიორგი გამარჯობა! გურულებზე და გურიაზე უგონოდ შეყვარებული აჭარელი ქალი ვარ :) იმდენად ახლობელი და ნაცნობია ჩემთვის თქვენი „გურული დღიურები"რომ მეგონა ყველა ეპიზოდში ნამყოფი ვიყავი. ვკითხულობდი და სევდა, მონატრება, სიხარული... ყველა ემოცია ერთად განვიცადე. თუმცა გურულებს უემოციოდ ვერ აუვლი გვერდს, ალბათ ეს მიყვარს ყველაზე უფრო...

თანაც ,ზუსტად ის 90-იანი წლები მომიწია გურიაში და გურულებთან ცხოვრება. ვან-ზომლეთში... კი "ბუშლატას ", სველი ძაღლის და ძველი სახლის სუნმა მართლაც გამბზარა ... მერე იყო 8 წლიანი პაუზა, წელს ისევ ვიყავი აღდგომას.

გურიაში მართლაც სულ სხვაგვარი სიყვარული იციან... თათარს მეძახდნენ ხუმრობით, მევიდა ჩვენი თათარიო მეტყოდნენ და ზუსტად ვგრძნობდი როგორი სიყვარულით ამბობდნენ ამას, არასოდეს მწყენია, მეც სეპარატისტებს ვეძახდი და არც იმათ ჰქონიათ პროტესტი... თქვენმა წიგნმა კიდევ უფრო დამარწმუნა, რომ მსოფლიო ორ ნაწილად იყოფა :) მაპატიეთ თავი თუ შეგაწყინეთ ,გურულებზე ლაპარაკით არ დავიღლები“...