"მაესტროს" სარეკლამო დროს "რუსთავი 2"ყიდულობს. ამის შესახებ ინფორმაციას გაზეთი "პრაიმტაიმი" ავრცელებს.

„ცნობილია, რომ მამუკა ღლონტი წინააღმდეგი იყო, „მაესტროს“ სარეკლამო დრო „რუსთავი 2“-ს ეყიდა. არ გამორიცხავენ, რომ მისი წასვლის მიზეზი სწორედ ეს უთანხმოება იყოს...ერთადერთი, ვინც ამ გარიგებით შესაძლოა, იზარალოს, ეს ტელეკომპანია „იმედია“, რომელსაც „რუსთავის 2“-ისა და „მაესტროს“ სარეკლამო სივრცის გაერთიანებით კიდევ უფრო მძლავრი კონკურენციის პირობებში მოუწევს სარეკლამო ბაზრის ათვისება.“, - წერს „პრაიმტაიმი“.

გამოცემასთან საუბრისას „რუსთავი 2“-ის გენდირექტორი ნიკა გვარამია ამ თემაზე არ საუბრობს.

„ეს კომერციული საკითხია, რომელსაც, მართალიც რომ იყოს, ვერ დაგიდასტურებთ. ასე რომ, ამაზე საუბარს აზრი არა აქვს“, – ამბობს გვარამია.

ცნობილია, რომ „რუსთავი 2“-თან მსგავსი ტიპის გარიგებას ეწინააღმდეგება „მაესტროს“ ერთ-ერთი დამფუძნებელი მამუკა ღლონტი, რომელმაც გვითხრა, რომ ამ საკითხის მასთან განხილვა ძალიან რთული იქნება.

„ეს ინფორმაცია, რა თქმა უნდა, სინამდვილეს არ შეესაბამება, მაგრამ მაინც გადაამოწმეთ არხის ხელმძღვანელობასთან. ასეთი საკითხი, რომ „რუსთავი 2“-მა „მაესტროს“ სარეკლამო დრო იყიდოს, ძალიან რთული განსახილველი იქნება ჩემთან“, – ამბობს მამუკა ღლონტი „პრაიმტაიმთან“ საუბრისას.