ჟურნალისტური ეთიკის ქარტია შსს-ს ,,სამხრეთის კარიბჭეზე“ ზეწოლაში ადანაშაულებს

საზოგადოება - 19:48, 14 Dec, 2014

1865

,,ჟურნალისტური ეთიკის ქარტია" შინაგან საქმეთა სამინისტროს ,,სამხრეთის კარიბჭეზე“ ზეწოლაში ადანაშაულებს. როგორც ქარტიის მიერ გავრცელებულ განცხადებაშია აღნიშნული, ამის საფუძველს რეგიონული გამოცემის გარშემო განვითარებული მოვლენები იძლევა.

,,საქართველოს ჟურნალისტური ეთიკის ქარტიის საბჭომ 11 დეკემბერს გაავრცელა განცხადება, რომელშიც სამართალდამცველებს გამოცემა ,,სამხრეთის კარიბჭის” ჟურნალისტების უსაფრთხოების უზრუნველყოფას სთხოვდა.

განვითარებული მოვლენები გვაძლევს საფუძველს, ვივარაუდოთ, რომ “სამხრეთის კარიბჭის” სარედაქციო დამოუკიდებლობაში უშუალოდ შსს-ს თანამშრომლები ერევიან. ქარტიის საბჭო ფლობს ინფორმაციას გამოცემის ჟურნალისტის მიმართ ბოლო 2 დღის განმავლობაში განხორციელებული მუქარისა და შანტაჟის შესახებ.

საქართველოს ჟურნალისტური ეთიკის საბჭო მოუწოდებს შსს-ს გენერალურ ინსპექციასა და საქართველოს პროკურატურას, უსწრაფესად გამოიძიონ “სამხრეთის კარიბჭის” ჟურნალისტებზე მიმდინარე ზეწოლის ფაქტები. შსს-ს მხრიდან უნდა შეწყდეს გამოცემის სარედაქციო საქმიანობაში ჩარევის მცდელობები და სრულად უზრუნველყონ ჟურნალისტების უსაფრთხოება.

ამ პროცესში მონაწილე პირებს შევახსენებთ, რომ ჟურნალისტის პროფესიული საქმიანობისთვის უკანონოდ ხელის შეშლა, ე.ი. მისი იძულება, გაავრცელოს ინფორმაცია ან თავი შეიკავოს მისი გავრცელებისაგან ისჯება საქართველოს სისხლის სამართლის კოდექსის 154-ე მუხლით.

ქარტიის საბჭო სრულ სოლიდარობას უცხადებს გაზეთ “სამხრეთის კარიბჭეს” და მოუწოდებს მედიასაშუალებებს, სამოქალაქო საზოგადოებას, სახალხო დამცველს და საერთაშორისო ორგანიზაციებს, ყურადღებით დააკვირდნენ “სამხრეთის კარიბჭის” ირგვლივ მიმდინარე მოვლენებს“, - ნათქვამია ,,ჟურნალისტური ეთიკის ქარტიის“ მიერ გავრცელებულ განცხადებაში.