პარლამენტმა საერთაშორისო შეთანხმების "სატრანსპორტო საშუალებების რეგულირების შესახებ" რატიფიკაცია მოახდინა, რითაც საქართველოს მიეცა შესაძლებლობა, მის ტერიტორიაზე წარმოებული თვლიანი სატრანსპორტო საშუალებები, მათ შორის, მსუბუქი და სატვირთო ავტომობილები, მისაბმელები, ავტობუსები, მოტოციკლები და სხვა თვითმავალი მანქანები და მექანიზმები და მათი სათადარიგო ნაწილები ავტომატურად იქნეს აღიარებული შეთანხმების წევრი 48 ქვეყნის მიერ. ეკონომიკის მინისტრის მოადგილის, ნათია მიქელაძის განცხადებით, მიუხედავად იმისა, რომ ამჟამად საქართველოში ავტომობილების წარმოება არ ხორციელდება, რამდენიმე კომპანიამ უკვე გამოთქვა სურვილი, საქართველოში დაიწყოს აღნიშნული პროდუქციის წარმოება.

„სანამ ამ კომპანიების წინადადებები დამუშავდება, მანამდე თავს შევიკავებ მათი დასახელებისგან. თავად შეთანხმებაზე გეტყვით ორიოდ სიტყვას, ძირითადი არსი ამ შეთანხმების არის შემდეგი: შეიძლება სურვილი მიერთებისა აქამდეც კი იყო გამოთქმული, მაგრამ მანქანების აქ აწყობისა და მათი სათადარიგო ნაწილების საქართველოში გადმოტანის საშუალება არ გვქონდა, რადგანაც ეს რომ გააკეთო, ამისთვის ქვეყანას უნდა ჰქონდეს მინიჭებული საიდენტიფიკაციო კოდი. ჩვენი შეთანხმება ამას უზრუნველყოფს და ეს გზა ჩვენ უკვე გაგვეხსნა. უკვე ორი წელია ამ თემაზე ვმუშაობთ და მივაღწიეთ იმას, რომ ჩვენთან იყვნენ ჩამოსული წარმომადგენლები ჰოლანდიური და ასევე, შვედური კომპანიებიდან, რომლებმაც ინტერესი გამოხატეს ურთიერთობის.ჯერჯერობით მიმდინარეობს ტერიტორიისა და ფართის შერჩევის პროცესი, რადგანაც ამ ქარხნებს საკმაოდ დიდი ტერიტორია დასჭირდებათ. რ გამოვრიცხავ, რომ დიდი დიღომიც იყოს. ჩვენ მიერ ნაწარმოებ მანქანას უნდა მივანიჭოთ გარკვეული კვოტები და საერთაშორისო სტანდარტით იყოს ის აღიარებული და მალე ჩვენ გვექნება ჩვენ მიერ წარმოებული ტრანსპორტი.

ჩვენი მთავარი პირობა ის არის, რომ აქ დასაქმდეს სწორედ ქართველი მუშახელი. თუ ისინი გვეტყვიან, რომ ჩვენ არ გვყავს შესაბამისი მუშახელი და სპეციალისტი, მაშინ ვეუბნებით, რომ თქვენ გადაამზადეთ, ეს თქვენ უზრუნველყავით ან ადგილზე, ან თქვენს ქვეყნებში შეასწავლეთ“- აცხადებს ნათია მიქელაძე.

წყარო "ალია"