ხმაური კლინიკა ,,მედალფაში“ - რატომ გახდა საჭირო პოლიციის გამოძახება

საზოგადოება - 15:59, 11 Dec, 2014

3893

ცოტა ხნის წინ ლანჩხუთში, კლინიკა ,,მედალფასთან“ ხალხმრავლობა იყო. „ნიუპოსტის“ ინფორმაციით, 6 თვის პატარას ბ.ჩ.-ს გადასარჩენად კლინიკის ექიმები იბრძონდნენ. ხმაურის მთავარი მიზეზი კი დაგვიანებული რეანომობილი გახლდათ.

_ ბათუმში ვიყავი და დამირეკეს, ბავშვი ცუდად არისო. აქ მოუყვანიათ, რეანომობილია გამოძახებული და ამდენ ხანს სად არის? ბათუმიდან ჩამოვედით და ის ვერ მოვიდა?! 3 საათია აქ ვართ და ველოდებით. _ გვითხრა მამაკაცმა, რომელმაც თავი პატარას ახლობლად გაგვაცნო.

როგორც გავიგეთ ხმაურის შემდეგ პოლიცია გამოიძახეს და 2 ადამიანი დაკითხვაზე წაიყვანეს.

,,მეც ვიყავი დაკითხვაზე. მითხრეს დაგიჭერთ თუ არ დამშვიდდებითო. როგორ დავმშვიდდე?! ყურადღებას არავინ გვაქცევს. ჟურნალისტები მოვიდნენ და ნახონ როგორ გვექცევიან. პირველი შვილიშვილია ჩემი. ძალიან ცუდად არის. თუ დროზე არ გადაიყვანეს ბავშვი შესაძლოა დაიღუპოს. ეს ამბავი მამაჩემმა რომ გაიგო ცუდად გახდა და ისიც საავადმყოფოში წევს ახლა“, _ თვალცრემლიანი გვიყვება ბატონი თამაზ ჯავახიძე, პატარას ბაბუა.

,,დაკითხვა ნორმის ფარგლებში ჩატარდა. მუქარა და რამე ზეწოლა არ ყოფილა, მაგრამ რის გამო? ყურადღებას რომ არ გვაქცევნდენ და ხმაური ავტეხეთ ამიტომ? _ გვიყვება ერთი ახალგაზრდა, რომელიც ვინაობას არ ასახელებს.

,,მე ბავშვის მამიდა ვარ, ბავშვს ღუპავენ. ყურადღებას არავინ აქცევს. 4 საათის წინ გამოიძახეს რეანომობილი, რომელიც ჯერ არ მოსულა. ეტყობა სანამ ყვირილი და ხმაური არ ავტეხეთ, მანამდე თავი არ შეიწუხეს. პოლიციით დაგვემუქრნენ. ეს არის სამართალი?! 6 თვის ბავშვი შესაძლოა დაიღუპოს და ესენი პოლიციით გვემუქრებიან.

ამასობაში კლინიკასთან რეანომობილი გამოჩნდა და ბავშვი ბათუმში გადაიყვანეს.

ჩვენ, კლინიკის მიმღებში ექიმებთან ვეცადეთ გაგვერკვია რა მოხდა. მათ კლინიკის მენეჯერთან ნესტან სურგულაძესთან გადაგვამისამართეს, რომელმაც ჩვენთან სატელეფონო საუბარში აღნიშნა, რომ ამ დროისთვის ქალაქგარეთ გასვენებაში იმყოფება და ჩვენს კითხვებზე პასუხს მოგვიანებით გასცემს.

თეა იოსელიანი - გურია