რა განსხვავებაა სიძვასა და მრუშობის ცოდვას შორის

საზოგადოება - 10:26, 11 Dec, 2014

10569

– რა განსხვავებაა სიძვასა და მრუშობის ცოდვას შორის და რა სასჯელი იყო ადრე ამ ცოდვათა ჩადენისათვის?
ადამიანის რეპროდუქციული უნარი, რომ თავისი მსგავსი შვას, შეიძლება ასევე გამოყენებულ იქნეს სიამოვნების წყაროდ. ეს კი უკვე იწვევს იმას, რასაც ჩვენ, ქრისტიანები, სიძვის ცოდვას ვუწოდებთ.
ღმერთმა ადამიანს მისცა კურთხევა აღორძინებისა და გამრავლებისა. თუ სულიერი აღორძინება არ არსებობს და გამრავლებას მხოლოდ ფიზიოლოგიური სიამოვნებისთვის იყენებ, ცხადია, ამით ღვთის კურთხევა ირღვევა.
– მრუშობა სიძვის კერძო გამოვლინებაა უფრო დამძიმებული ფორმით. სიძვა ღალატია ღმერთის, მრუშობის ცოდვა კი ღმერთთან ერთად ადამიანურ სიბრტყეში ღალატსაც გულისხმობს. მრუშობისას შენც ზიანდები და იმასაც აზიანებ, ვისაც ღალატობ.
ძველ აღთქმაში ფიზიკურად ისჯებოდა, ქვით იქოლებოდა არამარტო მრუში ქალი, არამედ კაციც. ორივეს გამოათრევდნენ და ქოლავდნენ ყოველგვარი შებრალების გარეშე. ახალ აღთქმაში კი ფიზიკური მოკვდინება გადმოსულია სულიერ მოკვდინებაში, ანუ ეკლესია არ გაძლევს უფალთან ერთობის საშუალებას. ადამიანი სიძვისთვის 7 წლით ისჯებოდა უზიარებლობით, მრუშობისთვის კი – 14 წლით. დღეს რომ ადამიანი ეკლესიაში არ მოუშვა, საერთოდ აღარ დაუბრუნდება უფლის სახლს. იმ დროს კი ეკლესიიდან განკვეთა საზოგადოებიდან მოცილებასაც გულისხმობდა. ეს კანონები არსებობს იმისათვის, რათა გვახსოვდეს, რაოდენ მძიმეა ეს ცოდვა.
– სიძვა ბევრისთვის მხოლოდ ქალის მიერ ამ ცოდვის ჩადენასთან ასოცირდება, მამაკაცებისთვის ის ცოდვად არ ითვლება. რამდენად სწორია ასეთი მიდგომა?
– პავლე მოციქული ამბობს: "ღვთის წინაშე არ არს მამაკაცობა და დედაკაცობა". რა თქმა უნდა, ორივეს თავისი ფუნქცია აქვს ამ ცხოვრებაში, მაგრამ ღვთის წინაშე ორივე თანაბარია. მრუში ქალი და მრუში კაცი არ განიყოფა. როცა ადამიანები უარს ამბობენ თავშეკავებაზე, აქ ასეთი ნიუანსია, თუ მე ღმერთთან არ ვარ, რატომ უნდა შევიკავო თავი, ხოლო თუ ღმერთი არსებობს, ეს ნიშნავს, რომ ცხოვრების წესს იცვლი და არ იცხოვრებ უღმერთოს მსგავსად.
– მიეტევება თუ არა ქრისტიანს ამ ცოდვის ჩადენა და როგორ შეიძლება მისგან თავის დაღწევა?
– სინანულის შემთხვევაში ადამიანს ყველა ცოდვა მიეტევება. ამ ცოდვისგან თავის დაღწევა შესაძლებელია. ღმერთი უნდა გახდეს ჩვენი ცხოვრების მიზანი, რადგან უკვდავი ხარ და უფლის წინაშე წარდგები. ღმერთთან ურთიერთობა ხომ მარადიულ სიხარულსა და ბედნიერებას გაძლევს, ცოდვა კი ორივეს გაკარგვინებს. ეკლესია არასოდეს ძალადობს და თითს არავის უქნევს, ჩვენ თავად ვაკეთებთ არჩევანს.

წყარო http://sana.ge/