შინაგან საქმეთა სამინისტროს მომსახურების გორის სააგენტოში თეორიული გამოცდის ჩაბარების მსურველთა ნაკადი არ წყდება. ხალხმრავლობის მიზეზი კი 15 დეკემბრიდან ახალი 3D ბილეთების შემოღებაა. მიუხედავად იმისა, რომ შინაგან საქმეთა სამინისტრომ, ბილეთების შინაარსის არგართულებასთან დაკავშირებით, განცხადება არაერთხელ გააკეთა, მოქალაქეები გამოცდების ჩაბარებას მაინც ჩქარობენ.

"მართვის მოწმობებთან დაკავშირებით არასწორი ინფორმაცია ვრცელდება ზოგიერთი მედია საშუალების მიერ. მომსახურების სააგენტომ არაერთი განცხადება გააკეთა და პრეზენტაციებიც გამართა თბილისსა და რეგიონებშიც. ახალი ბილეთები რომელიც 15 დეკემბრიდან შემოდის გართულებული არ არის! ახალ 3 დე ბილეთებში, რომელიც ძალაში 15 დეკემბრიდან შევა, დახვეწილია კითხვის როგორც შინაარსი, ასევე ფორმა და ვიზუალური მხარე. გამოყენებულია სიტუაციის აღმწერი ვიდეორგოლები, რის საშუალებითაც მართვის მოწმობის მსურველს სიტუაციის უკეთესად აღქმისა და გაანალიზების საშუალება ეძლევა. არ იცვლება კითხვების შინაარსი, რადგან არ შეცვლილა საგზაო მოძრაობის წესები, ასევე არაა გაზრდილი ბილეთების რაოდენობა. თეორიული გამოცდის15 დეკემბრამდე ჩაბარების არანაირი აუცილებლობა არ არის!", - წერს შინაგან საქმეთა სამინისტროს პრესსამსახური ნინო გიორგობიანი.

რაც შეეხება პრაქტიკულ გამოცდას, აქ რიგებს მოქალაქეები წერილობით ადგენენ. გვითხრეს, რომ სია წინასწარ ივსება, შესაბამისად, მომავალ მძღოლებს მთელი დღის განმავლობაში უწევთ ლოდინი. სიის გარეშე გამოცდაზე არავინ ,,დაიშვება". ასეთია მკაცრი თვითრეგულაცია მართვის მოწმობის აღების მსურველებს შორის.

წყარო: qartli.ge