ვინ ააშენებს ,,ხუდონჰესს“ - სახელმწიფო პროექტს იბრუნებს?

ბიზნესი & ეკონომიკა - 17:55, 07 Dec, 2014

2604

,,ხუდონჰესის“ მშენებლობა შესაძლოა სახელმწიფომ თავის თავზე აიღოს, - ამის შესახებ ენერგეტიკის მინისტრმა კახი კალაძემ, სასტუმრო "რედისონში" სტუდენტებთან შეხვედრაზე განაცხადა.

"ჩვენ ძალიან კარგად ვიცით "ხუდონჰესის" პროექტის მნიშვნელობა ჩვენი ქვეყნისთვის. დღესდღეობით მიმდინარეობს მოლაპარაკება არსებულ ინდურ კომპანია "ტრანსელექტრიკასთან". ჩვენ მოვთხოვეთ, რომ სრულიად გამჭვირვალედ წარიმართოს ყველანაირი პროცესი. ეს კომპანია დარეგისტრირებული იყო ოფშორში, ჩვენ კი მიზანშეწონილად მიგვაჩნია, ყველაფერი იყოს გახსნილი, რადგან ჩვენი ქვეყნის მოსახლეობის ინტერესი ამ პროექტთან მიმართებაში ძალიან მაღალია და დაფარული არაფერი არ უნდა იყოს. მოვთხოვეთ, წარმოადგინონ, ვინ არიან დამფუძნებლები და ასევე, გვინდა დაგვანახონ შესაძლებლობა, შესწევთ თუ არა ამ პროექტის განხორციელების უნარი", - განაცხადა კალაძემ.

კალაძის თქმით, გაურკვეველია იქ მცხოვრები ადამიანების მიწის მფლობელობის საკითხიც. მინისტრმა აღნიშნა, რომ წინა ხელისუფლებამ კომპანიას მიწები ერთ ლარად გადასცა ისე, რომ იქ მცხოვრებთათვის არაფერი უკითხავთ. როგორც კალაძემ განაცხადა, კომპანიის მხრიდან პირველ რიგში უნდა მომხდარიყო მიწების დაბრუნება მოსახლეობისთვის, ამასთან ერთად, მისი შეფასება და ანაზღაურება.

,,ამ ეტაპზე ვართ მოლაპარაკების პროცესში, რადგანაც ჩემს მიერ ჩამოთვლილი ყველა დეტალი უნდა იყოს გათვლილი და შემდეგ იქნება მიღებული გადაწყვეტილება მშენებლობასთან დაკავშირებით. მე არ დაგიმალავთ, ჩვენ გვქონდა საუბარი იმაზეც, ხომ არ დავიბრუნოთ სახელმწიფომ ეს პროექტი და თვითონ სახელმწიფომ განახორციელოს ეს პროექტი, მისი სტრატეგიული მნიშვნელობიდან გამომდინარე. მთავრობაში ამაზეც მიმდინარეობს მსჯელობა და უახლოეს მომავალში ყველასთვის ყველაფერი იქნება ცნობილი", - განაცხადა კახა კალაძემ.