საქართველოს ეკონომიკის მთავარი პრობლემა სავაჭრო დეფიციტია

საქართველოს ეკონომიკის მთავარი პრობლემა სავაჭრო დეფიციტია - აზიმ სადიკოვი

ბიზნესი & ეკონომიკა - 20:26, 05 Dec, 2014

3204

სავალუტო კურსის რყევები არ გამოიწვევს საქართველოს მაკროეკონომიკური ფუნდამენტის რყევას - ამის შესახებ ჟურნალისტებს საერთაშორისო სავალუტო ფონდის მუდმივმა წარმომადგენელმა საქართველოში, აზიმ სადიკოვმა განუცხადა.

სადიკოვი განმარტავს, რომ ეროვნული ბანკის მიზანი არა კურსის ფიქსირება, არამედ ფასების სტაბილურობაა. იგი იმედოვნებს, რომ თუკი ლარის მერყეობა ფასების ცვლილებაში გადაიზრდება, ეროვნულ ბანკს აქვს რეზერვები, ინფლაცია საანგარიშო მაჩვენებლამდე დააბრუნოს.

"ბოლო ხანს სავალუტო კურსში შეინიშნებოდა რყევები, მაგრამ ეს რყევები არ გამოიწვევს საქართველოს მაკროეკონომიკური ფუნდამენტის რყევას. მაკროეკონომიკური ფუნდამენტის ძირითადი მაჩვენებლები მყარი და ძლიერია, ლარი თვითონ არის მცოცავი კურსის მქონე ვალუტა. ეროვნული ბანკის მიზანს არ წარმოადგენს კურსის ფიქსირება. ეროვნული ბანკის მიზანია, ფასების სტაბილურობა. ეროვნულ ბანკს აქვს ინფლაციის საანგარიშო მაჩვენებელი, რაც შემდეგი წლისთვის 5 პროცენტს შეადგენს. თუ ისე მოხდა, რომ ლარის მერყევობა გადაიზარდა ფასების ცვლილებაში ანუ ინფლაციაში, ამ რაოდენობით, რომელიც საანგარიშო მაჩვენებლებს აღემატება, მაშინ ეროვნულ ბანკს, დარწმუნებული ვარ, გააჩნია რეზერვები და მონეტარული პოლიტიკის ინსტრუმენტები, რომ ჩაერიოს და ინფლაცია დააბრუნოს საანგარიშო მაჩვენებლამდე. მართალია ლარის კურსის ვარდნა მოხდა ძალიან მცირე პერიოდში და ეს მერყეობა ძალიან დიდად გამოჩნდა, თუმცა უნდა აღინიშნოს, რომ ბოლო 12 წლის განმავლობაში ლარი იყო სტაბილური, მაშინ, როდესაც საქართველოს ძირითად სავაჭრო პარტნიორებში ადგილობრივი ვალუტა ამ 12 თვის განმავლობაში გაუფასურდა. ამ ქვეყნებში ვგულისხმობ რუსეთს, უკრაინასა და სომხეთს", - განაცხადა აზიმ სადიკოვმა.

მანვე ლარის კურსის მერყეობის რამდენიმე მიზეზე ისაუბრა. ამასთან, სადიკოვნის თქმით, საქართველოს ეკონომიკის მთავარი პრობლემა სავაჭრო დეფიციტია, რაც ნიშნავს იმას, რომ ქვეყანა უფრო მეტს მოიხმარს, ვიდრე ეს ექსპორტზე გადის.

"თვითონ დოლარიც ძალიან ბევრი ვალუტის მიმართ გაძლიერდა. ჩეხური და პოლონური ვალუტები 10 პროცენტით გაუფასურდა დოლართან მიმართებაში. ამანაც იქონია თავისი გავლენა. არ გვაქვს ჯერ ნოემბრის საგარეო ვაჭრობის მონაცემები, მაგრამ სავარაუდოდ ექსპორტი შემცირდა და, შესაბამისად, უცხოური ვალუტის შემოდინება შემცირდა ქვეყანაში. ამანაც გამოიწვია დისბალანსი ლარსა და დოლარს შორის.

საგადამხდელო ბალანსის დეფიციტის შედეგი არის, რომ მათი ადგილობრივი ვალუტა უფასურდება. გვჭირდება სტრუქტურული ცვლილება, რომელიც გააძლიერებს ეკონომიკას, გაზრდის ჩვენს პოტენციალს და ჩვენ ექსპორტზე უფრო მეტის გატანა შეგვეძლება“, - განაცხადა სადიკოვმა და აღნიშნა, რომ საჭიროა ზრდა, რომელიც ჩვენს საწარმოო ექსპორტს გააძლიერებს.