„რომელიმე თქვენგანის და რომ გაბოზდეს, არ გახევთ ცემაში“?

საზოგადოება - 01:28, 05 Dec, 2014

9603

მწერალი და პუბლიცისტი ლელა კოდალაშვილი „ფეისბუქის“ საკუთრ გვერდზე იმ მდგომარეობას აღწერს, რომელიც იმ სკოლაშია, სადაც მისი შვილები სწავლობენ. ის ქვემოთ ჩამოთვლილი მოთხოვნების გამო შვილებისთვის ახალ სკოლას ეძებს.
ლელა კოდალაშვილი: „მეგობრებო, თუ გეგულებათ საჯარო სკოლა მთაწმინდისა და სოლოლაკის მიმდებარე ტერიტორიაზე:
1. სადაც პედაგოგები ბავშვებს გაკვეთილზე არ აიძულებენ კოლექტიურ ლოცვას და გაითვალისწინებენ მათს ჩამოუყალიბებლობას რწმენაში, ან ზოგიერთის სხვა კონფესიისამი მიკუთვნებულობას.
2. სადაც პედაგოგები გაკვეთილებზე ფილტვებს არ იხეთქავენ ხავილით და არ ისვრიან მერხებს, სკამებსა და სხვა მძიმე საგნებს.
3. სადაც პედაგოგები მოსწავლის მობილურებიდან უნებართვოდ და სისტემატიურად არ რეკავენ და არ იყვედრებიან, რომ მათ პატარა ხელფასი აქვთ და ეს ზარი ისევ მათ (ბავშვების) საქმეს ხმარდება.
4. სადაც პედაგოგები არ მოითხოვენ ბავშვებისგან, რომ უნდათ თუ არა, გაიზიარონ ის შეხედულებები, რომელსაც პედაგოგი აყალიბებს ამა თუ იმ ნაწარმოებსა თუ პერსონაჟზე.
5. სადაც პედაგოგები ქუჩაში მართლმადიდებელ მშობელთა კავშირის მიერ გავრცელებული პროკლამაციის აგრესიულ ტექსტს იმის შესახებ, რომ ვალენტინობა წმინდანის დღესასწაული კი არა, სინამდვილეში გარყვნილი ორგიაა, ბავშვებს არ უკითხავენ და მერე თავის მხრივ მკაცრ დირექტივას არ აძლევენ , რომ არ გაბედოს რომელიმე ბიჭმა გოგოს ამ დღეს ყვავილი აჩუქოს.
6. სადაც პედაგოგები არ მიმართავენ ბავშვებს სიტყვებით: ორუჯრედიანო, დაუნო, ნახირო, მათხოვარო და ა.შ.
7. სადაც პედაგოგები არ წარმოთქვამენ კლასში ასეთ სიტყვებს: რომელიმე თქვენგანის და რომ გაბოზდეს, არ გახევთ ცემაში? ან რომელიმეს ძმა რომ გეი გახდეს, დედას არ უტირებთ?
8. სადაც პედაგოგები არ ახვევენ ბავშვებს თავზე თავიანთ ოჯახურ კონფლიქტებს, ცუდ განწყობას, დაბალ ხელფასს და არ ეუბნებიან მათ სიტყვებს - ,,თქვენი გულისთვის მათხოვრულ ხელფასზე ვზივარ".
...ბევრს ვითხოვ? არადა, მგონია, რომ ძალიან ცოტას. უბრალოდ, ვეძებ საშუალო განათლების მქონე პედაგოგებს, რომლებიც არიან გაწონასწორებული ფსიქიკის, უყვართ თავისი საქმე და ბავშვებს თავს არ ახვევენ თავიანთ რელიგიურ, სექსუალურ და პოლიტიკურ შეხედულებებს, ისმენენ ბავშვების აზრს საპროგრამო თემებზე. მორჩა, სულ ესაა“...