ეროვნული ბანკის პრეზიდენტი გიორგი ქადაგიძე ლარის კურსის რყევას ეხმაურება. ჟურნალ "Business Time Georgia"-თან ინტერვიუში ქადაგიძე ამბობს, რომ ლარის კურსი ეკონომიკაში მიმდინარე პროცესებს და მოლოდინებს ასახავს, რაც მისი თქმით, კარგად ესმის მთავრობას.

„დარწმუნებული ვარ, ხარჯების დინამიკა და კომუნიკაცია ისე იქნება წარმართული, რომ მაღალ რყევებს თავიდან ავიცილებთ. ზოგადად კურსის მერყეობა შოკების დაბალანსების ფუნქციას ასრულებს. ჩვენ 2013 წელს პრაქტიკულად ყველაფერი გავაკეთეთ იმისთვის, რომ მონეტარული სტაბილურობა შენარჩუნებულიიყო და გაცვლითი კურსის დიდი რყევები არ ყოფილიყო. ეს არ იყო მცირე ინტერვენცია, ეს იყო მნიშვნელოვანი ინტერვენცია, მაგრამ ჩვენ არ ვართ მდიდარი ქვეყანა და ასეთი ინტერვენციების განხორციელების საშუალება სულ არ გვაქვს. რესურსი ფიზიკურად არ გაგვაჩნია. არაა სასურველი, რომ რეზერვები არათანაბარი ხარჯების გასანაიტრალებლად იხარკებოდეს“, - განაცხადა ქადაგიძემ.

კითხვაზე, თუ რამდენად აქვს ეროვნულ ბანკს იმის ფუფუნება, რომ ლარის კურსის დასაჭერად ინტერვენციები წელსაც განახორციელოს, ქადაგიძე პასუხობს, რომ "ეროვნული ბანკი ყოველთვის სტაბილურობის გარანტია".

„ეროვნული ბანკის მიზანია, რომ მინიმალურად მოახდინოს ინტერვენციები ბაზარზე, რაც აუცილებელია საბაზრო ეკონომიკის განვითარებისა და გრძელვადიანი სტაბილურობისთვის. ჩვენ არავითარ შემთხვევაში არ უნდა დავთმოთ ის მონეტარული და ფისკალური დისციპლინა, რომელსაც მივაღწიეთ. მონეტარული დისციპლინა სახეზეა. ბიუჯეტის დეფიციტი მშპ-თან მიმართებაში მართვადია. იმის გამო, რომ სხვა ტიპის პრობლემებია, ასეთი დისციპლინის დათმობა არასწორი იქნება და არამგონია, ჩვენ ეს გავაკეთოთ“, - განაცხადა გიორგი ქადაგიძემ.

ჟურნალ "Business Time Georgia“-ში გიორგი ქადაგიძის სრული ინტერვიუს წაკითხვა ხვალიდან იქნება შესაძლებელი.