გურიის რეგიონს ორი ახალი სასწრაფო დახმარების მანქანა გადაეცა

საზოგადოება - 15:20, 26 Nov, 2014

1728

ოზურგეთის შემდეგ ლანჩხუთისა და ჩოხატაურის მუნიციპალიტეტებს სამედიცინო წესით აღჭურვილი, მაღალი გამავლობის ავტომობილები, დღეს ქუთაისში გადაეცათ.

სასწრაფო დახმარების მანქანების გადაცემის ცერემონია, ქუთაისის მთავარ მოედანზე გაიმართა. ღონისძიებას შრომის, ჯანმრთელობისა და სოციალური დაცვის მინისტრი, დავით სერგიენკო, ასევე გურიის გუბერნატორი, გიორგი ჩხაიძე და ლანჩხუთისა და ჩოხატაურის მუნიციპალიტეტების საქართველოს პარლამენტის მაჟორიტარი დეპუტატები, თემურ ჭკუასელი და თემურ ჩხაიძე ესწრებოდნენ.

სასწრაფო სამედიცინო დახმარების ცენტრის ავტოპარკის განახლების მეორე ეტაპზე, დასავლეთ საქართველოს სასწრაფო დახმარების რაიონულ ცენტრებს 38 ახალი, სამედიცინო წესით აღჭურვილი ავტომობილი გადაეცა.

დასავლეთ საქართველოს მაღალმთიან რეგიონებში 30 მაღალი გამავლობის ,,Volkswagen”-ის მარკის ავტომობილი, ბარის ტიპის რეგიონებში კი საშუალო გამავლობის ”Ford”-ის მარკის 8 ავტომობილი განაწილდა.

სასწრაფო სამედიცინო დახმარების ცენტრის ავტოპარკის განახლების პროცესი, მთელი ქვეყნის მასშტაბით, 29 ოქტომბერს დაიწყო. სასწრაფო სამედიცინო დახმარების ავტოპარკი სრულად 2014 წლის ბოლომდე განახლდება.