„საქართველოს რკინიგზის“ გაფიცული თანამშრომლების საპროტესტო აქციები რეგიონებშიც მიმდინარეობს. უკვე ერთი საათია გაფიცულების ხაშურსა და ფოთში „საქართველოს რკინიგზისგან“ საკუთარი მოთხოვნების დაკმაყოფილებას ითხოვენ.

მათი თქმით, ეს მოთხოვნები ერთი თვის წინ აცნობეს ხელმძღვანელობას, თუმცა კონკრეტული პასუხი დღემდე არ მიუღიათ.

როგორც ხაშურის რკინიგზაზე შეკრებილებმა განაცხადეს, თუ მოთხოვნები არ დაკმაყოფილდება, ისინი ლიანდაგებს გადაკეტავენ.

მათ პარლამენტის მაჟორიტარი დეპუტატი ვალერი გელაშვილიც შეხვდა და მათ რკინიგზის ხელმძღვანელობასთან გარიგებას დაპირდა.

პროტესტის შეწყვეტას არ აპირებენ არც ფოთში შეკრებილი რკინიგზის თანამშრომლები. ისინი მე-13 ხელფასის მიღებას ითხოვენ და ამბობენ, რომ მოთხოვნის შესრულებამდე არ დაიშლებიან. დილიდან გაფიცვებია ასევე ქუთაისში და თბილისში.

„საქართველოს რკინიგზაში“ აცხადებენ, რომ რკინიგზა აგრძელებს მუშაობას ჩვეულ რეჟიმს, რკინიგზელების უმრავლესობა არ იფიცება.

მათი ინფორმაციით, დაფიქსირებული მოთხოვნების ცხრა პუნქტიდან საქართველოს რკინიგზის მენეჯმენტმა შვიდი დადებითად გადაჭრა.