ქალაქის მერმა „მისი სამეფო უმაღლესობა ბატონიშვილი ანასთვისაც“ მოიცალა და ოფიციალური შეხვედრა რამდენიმე დღის წინ შედგა. საქმიანი შეხვედრის ინიციატორი „დედათა კომიტეტი“ და „სამეფო ოჯახი“ იყო.

ყოველ შემთხვევაში ასეთი ფორმულირებით გავრცელდა ინფორმაცია თავდაპირველად. შეხვედრის დეტალებმა თავიდანვე გააჩინა კითხვები, რადგან ანა ბაგრატიონმა „დედათა კომიტეტის“ ხელმძღვანელის, ქეთევან ადამიას სურვილით მიწის ნაკვეთის საკუთრებაში გადაცემა ითხოვა, თანაც „გენიალური პროექტისთვის“.

აღნიშნული პროექტის თანახმად, ქეთევან ადამიამ „დედათა კომიტეტის“ თაოსნობით „აფხაზური ოდა“ ტაბახმელაში, ორი ჰექტარი მიწის ნაკვეთზე უნდა ააგოს, სადაც ასევე დაგეგმილია ტაძრის, სასტუმრო-მუზეუმისა და დედათა-მონასტრის აგება. ეს ყველაფერი კი აფხაზ ხალხთან ნდობის აღდგენის სახელით კეთდება.

ქეთევან ადამიას განცხადებით, თბილისის მერია იმსჯელებს ამ საკითხზე და ისინი პასუხს დაელოდებიან. დავით ნარმანიას პასუხს კი თავად სამეფო ოჯახის პასუხმა დაასწრო.

ეგრეთწოდებული სამეფო სახლის მეთაურმა, უფლისწულმა დავით ბაგრატიონ-მუხრანბატონმა განცხადება გაავრცელა და ანა გაბრატიონი სამეფო სახლის სახელის გამოყენებაში დაადანაშაულა: „გავეცანი ინფორმაციას ანა ბაგრატიონის ქ. თბილისის მერთან შეხვედრის თაობაზე. ვაცხადებ, რომ არანაირი კავშირი აღარ მაქვს ანა ბაგრატიონთან და მის ახალ პროექტებთან, ასევე იმ ასოციაციასთან, რომელსაც ის წარმოადგენს. მსურს, ყველას განვუმარტო, რომ ბაგრატიონ-მუხრანელთა სამეფო სახლსა და პირადად მე, არ გვითხოვია რაიმე მიწა სახლისა თუ სხვა რეზიდენციის ასაგებად ჩემი ვაჟის – გიორგისთვის, ვინაიდან ის მას არ საჭიროებს. ასევე, მინდა ვთხოვო ყველას, ვინც გეგმავს სარგებლის მიღებას ჩემი ვაჟის სახელის გამოყენებით, უარი თქვან გეგმებზე და სხვა საქმე მოძებნონ“.

წყარო გაზეთი "პრაიმტაიმი"