სახალხო დამცველი ბათუმის #3 საპყრობილეში არსებულ მძიმე პირობებზე საურობს

საზოგადოება - 13:29, 23 Nov, 2014

1469

ომბუცმენი სასჯელაღსრულების სამინისტროს დაწესებულებაში არსებული პრობლემების აღმოსაფხვრელად ზომების მიღებისკენ მოუწოდებს. უჩა ნანუაშვილი ბათუმის მესამე დაწესებლებაში არსებულ მძიმე პირობებზე საუბრობს. მისი ინფორმაციით, პრევენციის ეროვნული მექანიზმის მიერ ჩატარებული მონიტორინგის შედეგად გაირკვა, რომ დაწესებულებაში ვენტილაციის, წყლის მომარაგების პრობლემა არსებობს, არცერთი სარეაბილიტაციო პროგრამა არ მოქმედებს და არცერთი კულტურული და სპორტული ღონისძიება არ გამართულა; აღმოსავლეთ საქართველოდან გადმოყვანილ პატიმრებს ექმნებათ ოჯახთან და ადვოკატთან კავშირის შენარჩუნების პრობლემა. ომბუცმენის ინფორმაციით, სამარტოო საკნებში არ არის ადამიანის ღირსებასთან თავსებადი პირობები. მონიტორინგმა ასევე გამოავლინა, რომ დაწესებულებაში არის სამედიცინო მომსახურებასთან დაკავშირებული პრობლემები.

"მოპოვებული ინფორმაციით, პატიმრების მხრიდან პროტესტი უკავშირდება #3 დაწესებულებაში არსებულ პირობებს. ამასთან, ამ დროისთვის შიმშილობას განაგრძობს 16 პატიმარი, რამოდენიმე პატიმარს მიყენებული აქვს თვითდაზიანება, სამი პატიმარი ეტაპირებულია სასჯელაღსრულების #7 დაწესებულებაში, სადაც ასევე იმყოფებოდნენ სახალხო დამცველის რწმუნებულები. ეტაპირებულ ორ მსჯავრდებულს გ.ვ-ს და ბ.ო-ს სასჯელაღსრულების #3 დაწესებულებაში არსებული პირობების გამო მიღებული აქვთ მრავლობითი თვითდაზიანება, ხოლო მსჯავრდებული გ.კ. მის მიმართ რამდენიმე თვის წინ განხორციელებული არასათანადო მოპყრობის ფაქტების დროულ გამოძიებას ითხოვს. ამ დროისთვის მსჯავრდებულებს ადგილზე საჭირო სამედიცინო პროცედურები უტარდებათ. სახალხო დამცველის აპარატი გააგრძელებს მსჯავრდებულთა მდგომარეობის მონიტორინგს და მისი კომპეტენციის ფარგლებში მოახდენს შესაბამის რეაგირებას", - ნათქვამია სახალხო დამცველის აპარატის განცხადებაში.

ბათუმის მესამე საპყრობილეში პატიმარებმა შიმშილობა გამოაცხადეს, პროტესტი ციხეში არსებულ მძიმე მდგომაეობას უკავშირდებოდა. სასჯელაღსრულების სამინისტროს ინფორმაციით, პროტესტი პროვოცირებული იყო 4 პატიმრის მიერ, რომლებიც არიან ქურდული ტრადიციების მატარებელი.ამ დროისთვის შიმშილობა შეწყვიტა 23 პატიმარმა. საქმეს გენინსპექცია სწავლობს.