საქართველოს ფეხბურთელთა ეროვნული გუნდის ყოფილი მცველი, ლევან კობიაშვილი, ფეხბურთის ფედერაციის პრეზიდენტის არჩევნებში მონაწილეობას აპირებს.

ამის შესახებ მან პირველი არხის გადაცემა „არენაში“ განაცხადა. აქამდე კულუარებში საუბრობდნენ, რომ სფფ-ს პრეზიდენტის მომავალ არჩევნებზე კენჭს იყრიდა. ამჯერად მან ოფიციალურად დაადასტურა, რომ კანდიდატი იქნება და ფედერაციის თავკაცის პოსტისთვის იბრძოლებს.

კობიაშვილმა კარიერა ბერლინის „ჰერტაში“ დაასრულა და ამჟამად ამავე კლუბში მენეჯერად მუშაობს, კერძოდ, იგი ბერლინელთა საფეხბურთო აკადემიაში ბავშვთა ფეხბურთის ერთ-ერთი კურატორია.

კობიაშვილის განცხადებამდე ცნობილი იყო, რომ ფედერაციის პრეზიდენტობა ამავე ორგანიზაციის ამჟამინდელ გენერალურ მდივან რევაზ არველაძეს, ეროვნული ნაკრების ექსფეხბურთელ მიხეილ ყაველაშვილსა და ეროვნული გუნდის ყოფილ მწვრთნელ ვლადიმერ გუცაევს სურდათ.