“ერთიანი ნაციონალური მოძრაობის” მიერ დაგეგმილი აქციის პარალელურად, საქართველოს სხვადასხვა მუნიციპალიტეტში საჯარო მოხელეები და პედაგოგები "შაბათობაში" მონაწილეობის მისაღებად დაიბარეს.

აღნიშნულის შესახებ ინფორმაცია “თავისუფალი ზონის” წევრებმა გაავრცელეს: “როგორც მოგეხსენებათ, ყველა მუნიციპალიტეტში 15 ნოემბერი (შაბათი) ე.წ. ,,დასუფთავების დღედ” გამოცხადდა, რადგან ხელი შეუშალონ მოსახლეობას თბილისში დაგეგმილ აქციაში, არ მიიღონ მონაწილეობა. ყველა თანამშრომელს დააწერინეს განცხადება შემდგომში მათი ერთგვარი გადამოწმების მიზნით. ვინ შეძლებს ან რატომ ვერ შეძლებს 15 ნოემბერს სამსახურში გამოცხადებას”, - წერია “თავისუფალი ზონის” მიერ გავრცელებულ განცხადებაში.

იმავე შინაარსის შეტყობინება დატოვა სოციალურ ქსელ Facebook-ის ერთ-ერთ ჯგუფში მარნეულში მცხოვრებმა პედაგოგმაც.

“ხვალ ვინ მიდიხართ შაბათობაზე? ან, ბოლოს როდის იყო საყოველთაო შაბათობა, ხომ ვერ გაიხსენებთ?” – წერს პედაგოგი.

მარნეულის ტერიტორიული ორგანოს რწმუნებულმა, ელშან ჰასანოვმა დაადასტურა, რომ დღეს მუნიციპალიტეტის თანამშრომლები ქალაქს მართლაც ასუფთავებენ. მისი თქმით, დასუფთავების ღონისძიება მარნეულში ხშირად ეწყობა. დღესაც ერთი ასეთი “შაბათობა” აქვთ.

დასუფთავების დღეს აწყობს წალენჯიხის მუნიციპალიტეტიც, რომლის წარმომადგენლის თქმით, “შაბათობაში” აღნიშნული მუნიციპალიტეტის ყველა ორგანოს თანამშრომელი იღებს მონაწილეობას. მათ შორის, მასწალებლებიც. მუნიციპალიტეტის წარმოადგენელი ამბობს, რომ ღონისძიებაში ჩართვა სავალდებულოა. გამონაკლისი ხდება იმ შემთხვევაში, თუ ვინმეს გამოუვალი მდგომარეობა შეექმნება.

“ნაციონალური მოძრაობის” პოლიტსაბჭოს წევრის, ზურაბ ჭიაბერაშვილის ინფორმაციით, 15 ნოემბერი ყველა მუნიციპალიტეტში დასუფთავების დღედ გამოცხადდა. მისივე თქმით, “შაბათობებს” მხოლოდ იმ მიზეზით ატარებენ, რომ გააკონტროლონ ის ადამიანები, ვისაც დღევანდელ აქციაში მონაწილეობის მიღება სურს.

“საბავშვო ბაღებში სანიტარული ღონისძიების ჩასატარებლად დაიბარეს თანამშრომლები. მაგალითად, გარდაბანში, 2-დან 4 საათამდე მარათონს აწყობენ და გზას ისე კეტავენ, რომ ქალაქიდან მანქანები ვერ გამოვიდნენ”, - ამბობს ჭიაბერაშვილი.