ქვეყანამ დაკარგა გამორჩეული რეფორმატორი და ნათელი გონების ადამიანი- ვანო მერაბიშვილი

საზოგადოება - 18:09, 14 Nov, 2014

2593

"მინდა მივუსამძიმრო კახა ბენდუქიძის ოჯახს და სრულიად საქართველოს, ვინაიდან მიმაჩნია, რომ მისი გარდაცვალებით ქვეყანამ დაკარგა ერთ-ერთი ყველაზე გამორჩეული რეფორმატორი და ნათელი გონების ადამიანი. ბენდუქიძის გახსენებისას, მის მიერ გატარებული წარმატებული რეფორმების გარდა ყველას გაახსენდება ის საქმე, რომელსაც მან უდიდესი ენერგია და დრო დაახარჯა - საქართველოში ერთ-ერთი ყველაზე წარმატებული საგანმანათლებლო ცენტრის შექმნა.

ერთ-ერთ მთავრობის სხდომაზე ე.წ. „სასოფლო უნივერსიტეტის“ მომავალ სტატუსს ვიხილავდით. განხილვის დროს გაირკვა, რომ კახა ბენდუქიძე ფულს დებდა უნივერსიტეტში, რომელსაც ფონდის სტატუსი ექნებოდა. ანუ, ჩადებული ფული მოხმარდებოდა მხოლოდ უნივერსიტეტს - სტუდენტებს და სამეცნიერო კვლევებს. ეს ნიშნავდა, რომ ბენდუქიძე რამდენიმე მილიონს უსასყიდლოდ, პირადი ინტერესის გარეშე გადასცემდა საზოგადო საქმეს.

მე ვკითხე, თუ რატომ აკეთებდა ამას. მან მიპასუხა, რომ ყველაზე კარგი რისი გაკეთებაც მას შეუძლია, არის მისცეს უამრავ ადამიანს მაღალი ხარისხის განათლების მიღების საშუალება. ის თვლიდა, რომ განათლება ქვეყნის და ხალხის განვითარების და კეთილდღეობის უმთავრესი საფუძველია.

სწორედ მსგავსი მიდგომა გამოარჩევდა მას შეძლებული ადამიანების უმეტესობისგან - მას შეეძლო ზუსტად განესაზღვრა თუ რა იყო საზოგადოების განვითარებისთვის პრიორიტეტი და არ დაეშურებინა მის მისაღწევად არც ენერგია და არც რესურსები.

კიდევ ერთხელ ვუსამძიმრებ კახა ბენდუქიძის ოჯახს და სრულიად საქართველოს, რომლისთვისაც იგი უკანასკნელი წლების ერთ-ერთი ყველაზე დიდი დანაკარგია."- წერს ვანო მერაბიშვილი