განცხადება ასოციაცია ,,ატუ“-ს მიერ რაჭაში განხორცილებული ტყის ჭრის შესახებ

ბიზნესი & ეკონომიკა - 19:51, 13 Nov, 2014

2986

სოციალურ ქსელებში და საინფორმაციო საშუალებებში გავრცელდა ინფორმაცია ასოციაცია ,,ატუ“-ს მიერ რაჭაში ხე-ტყის დამზადებასთან დაკავშირებით, საზოგადოების მაღალი ინტერესიდან გამომდინარე განვმარტავთ შემდეგს:

არასამეწარმეო (არაკომერციული) იურიდიული პირი ასოციაცია ,,ატუ“ წლების განმავლობაში ახორციელებს საქართველოს მასშტაბით მნიშვნელოვანი ობიექტების მშენებლობას. ასოციაციას თავისი არსებობის მანძილზე განხორციელებული აქვს 80-ზე მეტი დიდი და საშუალო მოცულობის საქველმოქმედო პროექტი. აღნიშნული პროექტების საფუძველზე შექმნილი მატერიალური ფასეულობები პერიოდულად, დასრულებისთანავე, უსასყიდლოდ საკუთრებაში გადაეცემოდა სახელმწიფოს ან ადგილობრივ თვითმმართველობებს და ეს პროცესი დღემდე გრძელდება. (2011-2013 წლებში გადაცემული მატერიალური ფასეულობის ღირებულება შეადგენს 228 მილიონ ლარს). იმის გათვალისწინებით, რომ ასოციაცია „ატუ“ თავისი ძალებით ახორციელებს მშენებლობებსა და კაპიტალურ შეკეთებებს, მშენებლობისთვის იყენებს ხის მასალას, რის შეძენაც ბაზარზე საკმაოდ შეზღუდულია, ასოციაცია კანონმდებლობის სრული დაცვით პერიოდულად წერილობით მომართავდა გარემოსა და ბუნებრივი რესურსების დაცვის სამინისტროს შუამდგომლობისთვის საქართველოს მთავრობის წინაშე სამასალე მერქნის გამოყოფის შესახებ.

„ასოციაცია ,,ატუ“-ს დასაბუთებული მოთხოვნის შესაბამისად საქართველოს მთავრობის 2013 წლის 31 ოქტომბრის N 1529 განკარგულებით გამოეყო რაჭა-ლეჩხუმ ქვემო სვანეთის რეგიონში ტყეკაფები 10.000 მ3 ხე-ტყის მისაღებად (როგორც სამასალე ასევე საშეშე). აღნიშნული ტყეკაფებიდან მიღებული პირველი ხარისხის (სამასალე) მერქანი ასოციაცია ,,ატუ’’-ს მიერ უნდა მოხმარდეს მნიშვნელოვანი ობიექტების მშენებლობას, კერძოდ:

Ø ზ. ფალიაშვილის სახელობის ოპერისა და ბალეტის თეატრის ძირითადი კორპუსის მშენებლობა-შეკეთებისათვის;

Ø მიწის ძვრით დაზარალებულთა სახლების მშენებლობისათვის;

Ø მოსახლეობის ინდივიდუალური სახლების სახურავის შეცვლისათვის;

Ø ნატანების საკონცერტო დარბაზის მშენებლობისათვის- ქუთაისში, ბათუმში, ფოთში და გორში რაგბის რეგიონალური ბაზის მშენებლობისათვის;

Ø საჩხერის მუნიციპალიტეტის პერევის საჯარო სკოლის მშენებლობისათვის;

Ø საჩხერის I საჯარო სკოლის მშენებლობისათვის;

Ø სხვა არაკომერციული საქმიანობა, რომლებიც არ არის აკრძალული საქართველოს კანონმდებლობით

პროგრამით გათვალისწინებული მშენებლობის დასრულებისათვის შეიქმნა საჭიროება მთავრობის განკარგულებით 5000კბმ ხე-ტყის გამოყოფაზე, საიდანაც 2500-3000 მ3 I ხარისხის (სამასალე) მერქანი მოხმარდება ზემოთ აღნიშნულ პროექტებს, ხოლო დანარჩენი დამზადების შედეგად მიღებული II ხარისხის (საშეშე) მერქანი უსასყიდლოდ გადაეცემა რეგიონის მუნიციპალიტეტებს.

ხაზგასმით აღვნიშნავთ, რომ „ასოციაცია ,,ატუ“ საგანმანათლებლო, სამეცნიერო-კვლევითი, ჯანმრთელობის დაცვის, კულტურული და სპორტული დაწესებულებების რესტავრაცია-მშენებლობისა და ეკოლოგიური და სოციალური პროექტების განხორციელების გადაუდებელ ღონისძიების მიზნით, 2008 წლიდან ხე-ტყის დამზადებას ახორციელებს", - ნათქვამია გარემოს დაცვის მიერ გავრცელებულ განცხადებაში.

ცნობისათვის, ვრცელდებოდა ინფრომაცია, რომ ბიძინა ივანიშვილის კომპანია ,,ატუ" რაჭაში ტყეს ჩეხდა, კერძოდ საუბარია, შაორის ტბის მიმდებარე ტყეზე. ინფორმაციის თანახმად, „ატუს'' რაჭაში სოციალური ჭრის ნებართვა მაშინდელი პრემიერ-მინისტრის ბიძინა ივანიშვილის განკარგულებით მიენიჭა.