ქალაქ ოზურგეთსა და ოზურგეთის მუნიციპალიტეტში სულ 42 საჯარო და 2 კერძო სკოლა ფუნქციონირებს, ყველა სკოლაში წყლის მიწოდების სისტემა განსხვავებულია. სასმელი წყლის ხარისხი კი სათანადო რეგულარობით არ მოწმდება, კვლევები საჯარო სკოლებში სასმელი წყლის ვარგისიანობასთან დაკავშირებით არასამთავრობო ორგანიზაცია „ახალგაზრდა პედაგოგთა კავშირის” ბაზაზე არსებულმა ლიდერთა სკოლისა და ახალგაზრდული ცენტრის წარმომადგენლებმა ჩაატარეს.

კვლევის შედეგად, მუნიციპალიტეტში 37 სკოლიდან მხოლოდ 5-მა სკოლამ შეამოწმა წყლის ხარისხი. სკოლის დირექტორების განცხადებით, ეს გამოწვეულია იმით, რომ წყლის ლაბორატორიული სინჯის გაკეთება 450 ლარი ჯდება, რისი შესაძლებლობაც სკოლის ბიუჯეტს არ გააჩნია.

“ვფიქრობთ რომ ეს განათლების სამინისტროს მოსაგვარებელია. “ – აცხადებენ დირექტორები.

გაერთიანებული წყალმომარაგების კომპანიის, ოზურგეთის ფილიალის ხელმძღვანელი დავით ცერცვაძე, ირწმუნება რომ წყლის ხარისხი ოზურგეთის სკოლებში რამდენჯერმე შემოწმდა და დადებითი პასუხი მიიღეს, შიდა გაყვანილობების მოწესრიგებაზე კი პასუხისმგებლობას თავად სკოლებს აკისრებს.

„ჩვენ ხშირად ვახდენთ წყლის ხარისხის შემოწმებას, თუმცა ხშირია შემთხვევები, როდესაც სასწავლო დაწესებულებამდე სუფთა ხარისხის წყალი მიდის და იქ არსებულ ავზებში ვარდება წყლის ხარსხი. ჩვენ ვალდებულები ვართ შენობამდე წყალი მაღალი ხარისხით მივიყვანოთ, შიდა გაყვანილობები თუ მოუწესრიგებელია და წყალს აბინძურებს ეს ჩვენი მოსაგვარებელი არაა, ამაზე სკოლებმა უნდა იზრუნონ”- აცხადებს ცერცვაძე.

თეა იოსელიანი - გურია