ამალია ჯიბლაძე: „დიდი მადლობა მინდა გადავუხადო იმათ, ვინც მხარში ამომიდგა“

საზოგადოება - 07:53, 05 Nov, 2014

3497

სიმფონიური ორკესტრის წევრები ამალია ჯიბლაძეს რეპეტიციის შემდეგ ტაშით შეეგებნენ. ნიკოლოზ რაჭველი ამალიას ნიჭით გაოცებულია.

მეგაშოუ „ნიჭიერის“ აღმოჩენა ამალია ჯიბლაძე "სხვა შუადღეში" ნიკოლოზ რაჭველის დირიჟორობით ორკესტრთან ერთად იმღერებს. გადაცემა ,"რუსთავი 2-ის" ეთერში ოთხშაბათს 12 საათიანი "კურიერის" დამთავრებისთანავე დაიწყება.
მანამდე კი ახალბედა მომღერალი რეპეტიციებს გადის.
ნიკოლოზ რაჭველი: „მე ამ სიმღერას გავუკეთე ახლებური, საორკესტრო ვერსია, რომელიც არანაირად არ ჰგავს იმას, რაც მან ნიჭიერში შეასრულა. ვღელავდი, იმაზე თუ როგორი იქნებოდა პირველი რეპეტიცია, შეძლებდა თუ არა, ამ აბსოლუტურად ახალ ჟღერადობასთან მორგებას. ჩემი გაოცება გამოიწვია იმან, რომ ამ ადამიანს მართლაც განსაკუთრებული ნიჭი აქვს, რადგან ადაპტაციაც არ დასჭირდა პირველივე შესრულების დროს მან ყველაფერი გააკეთა ზუსტად და რაც მთავარია ისე, რომ ორკესტრის წევრების აპლოდისმენტები დაიმსახურა. რაც დამერწმუნეთ იშვიათად ხდება“.
ამალია ჯიბლაძე: ორკესტრთან ერთად რეპეტიციამ, ძალიან დიდი შთაბეჭდილება მოახდინა ჩემზე. პირველად შევეხე ამ სფეროს რასაც ჰქვია ორკესტრი.ჩემთვის ეს ძალიან მნიშვნელოვანია. ძალიან დიდი მადლობა მინდა გადავუხადო იმათ, ვინც მხარში ამომიდგა.