ცოტა ხნის წინ გორში "ქართული მედია ჯგუფმა" საგანგებო ბრიფინგი გამართა, ორგანიზაციის წარმომადგენლები საერთაშორისო ორგანიზაციებს და შსს-ს წარმომადგენლებს მოუწოდებენ, გუშინ ტელეკომპანია "თრიალეთში" მომხდარ ინციდენტზე რეაგირება დაუყოვნებლივ მოახდინონ , როგორც ორგანიზაციის წარმომადგენელი ნინო ჩიბჩიური აცხადებს, რეგიონული მედიის წარმომადგენლების უფლებები ხშირად ირღვევა, რასაც ბოლო უნდა მოეღოს. სამართალდამცავებმა და საერთაშორისო ორგანიზაციებმა კი მსგავს ფაქტებზე შესაბამისი რეაგირება უნდა მოახდინონ.

მისი თქმით გუშინ, ტელეკომპანია "თრიალეთში" მომხდარი ინციდენტი, არის ჟურნალისტის საქმიანობაში ხელის შეშლა და ჟურნალისტის სიცოცხლის ხელყოფის მუქარა.

გუშინ, სააგენტო „ნიუპოსტისა“ და ტელეკომპანია „თრიალეთის“ ჟურნალისტს, გიორგი ახალკაცს, ფიზიკური განადგურებით დაემუქრნენ.

ტელეკომპანია „თრიალეთის“ ეთერში გასულმა სიუჟეტმა, სადაც ასახულია მასწავლებელი ირინა ტურაშვილი, რომელიც თავის მოსწავლეებს სცემდა, ქალბატონის მეუღლის გაღიზიანება გამოიწვია.

მამაკაცი ტელეკომპანიის ოფისში მიიჭრა და მოითხოვდა გიორგი ახალკაცის ნახვას. ეს უკანასკნელი ჟურნალისტს ყელის გამოჭრით ემუქრებოდა. ადგილზე გამოძახებული იქნა საპატრულო პოლიცია, ასევე ცნობილია, რომ მამაკაცს სავარაუდოდ თან დანა ჰქონდა.