მერაბიშვილის თავისუფლების სანაცვლოდ მესხელი საიდუმლო თათბირების ჩანაწერებს გამოაქვეყნებს

საზოგადოება - 13:35, 28 Oct, 2014

15899

„აშკარად უყურადღებოდ მიტოვებული მერაბიშვილი, როგორც „ქრონიკა +“- ს საკუთარი წყარო უყვება, ღიად ეძებს კავშირებს ახალ ხელისუფლებასთნ. ცხადია, მას პირდაპირ ჩვენების მიცემა სააკაშვილისა და მისი ხელისუფლების მაღალჩინოსნების წინააღმდეგ არ უნდა, ამიტომ მოლაპარაკებებში მისი მარჯვენა ხელი და ყოფილი მოადგილე, ამირან მესხელი მონაწილეობს. მესხელთან უკვე გაიმართა რამდენიმე შეხვედრა და როგორც ჩვენი წყარო გვიყვება, ნოემბრის მიწურულს საბოლოო მოლაპარაკება უნდა შედგეს. მერაბიშვილის თავისუფლების სანაცვლოდ ამირან მესხელმა იმ საიდუმლო თათბირების ჩანაწერები უნდა გამოაქვეყნოს, რომლებიც მიხეილ სააკაშვილთან იმართებოდა და რომელსაც, სავარაუდოდ სწორედ მერაბიშვილი იწერდა“, - წერს გამოცემა.„ქრონიკა +“-ის ინფორმაციით, ჯერ-ჯერობით მესხელი პირობას დებს, რომ ჩანაწერები სოციალური ქსელებით ინტერნეტსივრცეში უცხოეთიდან გავრცელდება, რადგან თუ ვანო მერაბიშვილი ციხის საკანს და პირობებს ვერ გაუძლებს და ოფიციალური ჩვენების მიცემას გადაწყვეტს სააკაშვილის ხელისუფლების მაღალჩინოსნებზე, ამას ავტომატურად მოყვება მის წინააღმდეგ ყოფილი ძალოვნების ჩვენებები. გამოცემის წყარო ირწმუნება, რომ ვანო მერაბიშვილს ეს უკვე შეუთვალა ბაჩო ახალაიამ, ამდენად ის ღია დაპირპისპირებაში შესვლას ყოფილ თანაგუნდელებთან ვერ გაბედავს და სწორედ ამიტომ მიდის მოლაპარაკებები კულუარულად და ამირან მესხელის მეშვეობით. გამოცემა არ გამორიცხავს, რომ ჩანაწერები სწორედ 23 ნოემბრის წინ, ანუ „ვარდების რევოლუციის“ მორიგ წლისთავზე გავრცელდება.

წყარო „ქრონიკა +“