2015 წლიდან აბიტურიენტების გამოცდების ჩამონათვალს შესაძლოა ახალ საგანი - სამოქალაქო განათლება დაემატოს. შევა თუ არა საგანი არჩევითი საგამოცდო საგნების ჩამონათვალში, ამის შესახებ გადაწყვეტილება უშუალოდ უმაღლესი სასწავლებლების ხელმძღვანელებმა უნდა მიიღონ.

საგნის მნიშვნელობაზე "კურიერს" გამოცდებისა და შეფასების ეროვნულ ცენტრის დირექტორი, მაია მიმინოშვილი, ესაუბრა. სწორედ ამ ცენტრის ინიციატივაა სამოქალაქო განათლების საგამოცდო საგნებში შეტანა.

„ეს გახლავთ ჩვენი ორგანიზაციის ინიციატივა. თუმცა, გადაწყვეტილება, ბუნებრივია, არ არის მიღებული. პირველ რიგში, გადაწყვეტილება უმაღლესმა სასწავლებელმა უნდა მიიღოს, თუ ის თვლის, რომ სავალდებულოდ გამოაცხადოს კონკრეტულ ფაკულტეტზე ჩარიცხვისათვის,“ - განაცხადა "კურიერში" საუბრისას მაია მიმინოშვილმა.

გადაწყვეტილების მიღებაში განათლების სამინისტროც ჩართულია. სამოქალაქო განათლება სავალდებულო საგანი უკვე არის სკოლების მე-9-ე და მე-10-ე კლასებში, ხოლო შემდეგ საფეხურებზე ის უკვე არჩევითია.

რაც შეეხება უფრო დაბალ საფეხურებს, მაია მიმინოშვილის განცხადებით, განათლების სამინისტრო მუშაობს, რომ საგნის სწავლება უფრო ინტენსიური გახდეს. თუმცა, ამ ეტაპზე, სამოქალაქო განათლება ინტეგრირებულია სხვა საგნებთან.