რა მოხდა სოფელ კოლაგში 30 სექტემბრის ღამეს? არჩევნებამდე რამდენიმე საათით ადრე 8 თვის ბარბარე რაფალიანცი წყლით სავსე ქვევრში გარდაცვლილი იპოვეს. გამოძიება დღემდე მიმდინარეობს, თუმცა საკვანძო დეტალები უცნობი რჩება. მედია კი სამართალდამცავი უწყებებისგან განსხვავებით, დღემდე დიდ დაინტერესებას გამოხატავს აღნიშნული საკითხისადმი.

„ქრონიკა +“ სანდო წყაროზე დაყრდნობით აცხადებს, რომ მანანა ბერიკაშვილმა ბარბარე რაფალიანცის დეიდას, მსგავსი სცენის გათამაშებისათვის 30 ათასი ლარი გადაუხადა, თუმცა, ბავშის გარდაცვალება დაგეგმილი არ ყოფილა:

„რა მოხდა არჩევნების ღამეს გურჯაანში? დეტალების გარკვევას მედია, გამოძიებისგან განსხვავებით, ამ დრომდე ცდილობს, თუმცა, როგორც ჩვენი წყარო ირწმუნება, გამოძიებამ იმავე ღამეს იცოდა, რომ ბავშვის მკვლელობა წინასწარ დაგეგმილი არ ყოფილა, ის გაუთვალისწინებელი დეტალის მსხვერპლი გახდა... მაგრამ პირველი ოქტომბრის არჩევნების შემდეგ გამომძიებლებს საკუთარი ბედიღბალი უფრო ანაღვლებდათ, ვიდრე რაფალიანცის მკვლელობის საქმეზე დეტალების დადგენა და მტკიცებულებების მოპოვება, რა იცოდა გამოძიებამ და რატომ დარჩა საქმე გამოუძიებელი?

„ქრონიკა+“-ის წყაროს ინფორმაციით, არსებობდა შეთანხმება მანანა ბერიკაშვილსა და რაფალიანცის დეიდას შორის, რომ ბავშვი ქვევრში უნდა გადაემალათ და გურჯაანში დიდი აჟიოტაჟი უნდა შექმნილიყო, ბავშვის გატაცება უნდა დაბრალებოდა „ნაციონალურ მოძრაობას“, რადგან მანანა ბერიკაშვილი, მიუხედავად კახეთში არსებული მუხტისა, გურჯაანში არჩევნებს ვერ იგებდა. ოჯახში 30 სექტემბრის ღამეს უცხო პირი, როგორც ამბობენ, ვერ შევიდოდა, რადგან ეზოში ძაღლი აუცილებლად ატეხდა ყეფას. პირველ სართულზე საწოლში დაძინებული 8 თვის ბავშვი საწოლიდან ვერ გადმოვიდოდა, რადგან სიარული არ იცოდა, მით უფრო, საბანს ძირს ვერ გადმოაგდებდა და ქვევრში ვერ ჩაძვრებოდა. ჩვენი წყაროს ინფორმაციით, ბარბარე რაფალიანცი ქვევრში სწორედ ოჯახის ერთერთმა წევრმა, კერძოდ, დეიდის ქმარმა ჩასვა და სწორედ აქ დაუშვა მომაკვდინებელი შეცდომა - ქვევრი წინა დღეების წვიმების გამო წყლით აღმოჩნდა სავსე. „ქრონიკა+“-ის წყარო აცხადებს, რომ მანანა ბერიკაშვილმა ამ აჟიოტაჟისთვის დეიდას წინასწარ 30 ათასი ლარი გადაუხადა, ბავშვის დაღუპვა კი მისთვისაც მოულოდნელი შოკი იყო და ოჯახის წევრებისთვისა“, - ნათქვამია სტატიაში.