სკანდალური აქციებით ცნობილი რუსი მხატვარი, პეტრე პავლენსკი, მოსკოვში სოციალური და სასამართლო ფსიქიატრიის ცენტრის შენობის სახურავზე შიშველი ავიდა და ყურის ბიბილო მოიჭრა. მან თავის პერფორმანსს „გამოყოფა“ დაარქვა და განაცხადა, რომ როგორც დანა ყოფს ყურს და სხეულს ერთმანეთისგან, ისე ფსიქიატრიის ბეტონის კედელი ყოფს ადამიანებს ჭკვიანად და გიჟად. მისი განცხადებით რუსეთში ფსიქიატრიის პოლიტიკური მიზნებით გამოყენება ხდება და ეს აქციაც ამის წინააღმდეგ იყო მიმართული.

პავლენსკი მსგავსი სკანდალური პერფორმანსები ადრეც გაუკეთებია, 2012 წელს მან Pussy Riot-ის სასამართლო პროცესების გასაპროტესტებლად სანკტ-პეტერბურგში ყაზანის ტაძრის წინ პირი ამოიკერა.

2013 წლის მაისში ის საკანონმდებლო ორგანოს წინ ეკლიან ბადეში შიშველი გაეხვა, რაც რუსეთის საკანონმდებლო ორგანოს კანონშემოქმედებითი საქმიანობის გაპროტესტებას ისახავდა მიზნად.

2013 წლის ნოემბერში რუსი ხალხის აპათიის გასაპროტესტებლად მან წითელ მოედანზე სასქესო ორგანო ფილაქანზე მიიჭედა.

პოლიციამ შიშველი და „ყურმოჭრილი“ მხატვარი დააკავა და საავადმყოფოში გადაიყვანა. დაზიანებული ყურის გარდა ექიმები პაციენტის ფილტვების ანთებასაც მკურნალობენ. მხატვარი საპროტესტო აქციის დროს სრულიად გაშიშვლდა, მოსკოვში კი ამჟამად ყინვებია.